संवैधानिक परिषद्को बैठकः निर्वाचन आयोगको सदस्यमा प्रधान सिफारिश

निर्वाचन आयोगको सदस्यमा कृष्णमान प्रधानलाई सिफारिश गरिएको छ ।

आइतवार बालुवाटारमा बसेको संवैधानिक परिषद्को बैठकबाट प्रधानलाई सर्वसम्मतबाट सिफारिश गरिएको उपसभामुख इन्दिरा राना मगरले लोकान्तरलाई जानकारी दिइन् ।

रोस्टरमा रहेका मुस्लिम आयोग, महिला आयोग, प्राकृतिक स्रोत तथा वित्त आयोगको रिक्त सदस्य र राष्ट्रिय समावेशी आयोगको अध्यक्ष पद रिक्त रहेपनि ती विषयमा कुनै छलफल नभएको उनले बताइन् ।

‘कानूनी ब्याकग्राउण्ड भएको र उमेर पनि ५७ वर्ष पुगेको हुनाले निर्वाचन आयोगको रिक्त रहेको सदस्य पदका लागि अध्यक्षले प्रधानको नाम सिफारिश गर्नुभयो,’ उपसभामुख राना मगरले लोकान्तरसँग भनिन्, ’अध्यक्षको प्रस्तावमा सबैले सहमति जनाउनु भयो । सर्वसम्मतले नै उहाँको नाम सिफारिश गरिएको हो ।’

संवैधानिक आयोगहरूमा रिक्त रहेका पदाधिकारी नियुक्ति गर्नका लागि आइतवार प्रधानमन्त्री निवास बालुवाटारमा संवैधानिक परिषदको बैठक बसेको थियो ।

प्रधानमन्त्री पुष्पकमल दाहाल प्रचण्डको अध्यक्षतामा बसेको बैठकमा सभामुख देवराज घिमिरे, राष्ट्रियसभाका अध्यक्ष नारायणप्रसाद दाहाल, प्रधानन्यायाधीश विश्वम्भरप्रसाद श्रेष्ठ, प्रतिपक्षी दलका नेता नेपाली कांग्रेसका सभापति शेरबहादुर देउवा र उपसभामुख राना मगर उपस्थित थिए ।

संवैधानिक परिषदको अध्यक्ष प्रधानमन्त्री हुने प्रावधान छ ।