हंगेरीलाई हराएर दोस्रो चरणमा जाने लक्ष्यमा घरेलु टोली जर्मनी

जर्मनीमा जारी युरोकप फूटबल प्रतियोगिताअन्तर्गत बुधवार तीन खेल हुँदैछन् । 

नेपाली समयअनुसार साँझ ६ः४५ बजे क्रोएसिया र अल्बानियाबीच प्रतिस्पर्धा हुनेछ । समूह ‘बी’मा यी दुवै टोलीले पहिलो खेल हारेका थिए । यसर्थ बुधवार साँझ दुवै टोली जित्नैपर्ने दबाबसहित मैदानमा उत्रने छन् ।

यस्तै बुधवार राति ९ः४५ बजे घरेलु टोली जर्मनीले हंगेरीको सामना गर्दैछ । चिरपरिचित प्रतिद्वन्द्वी हंगेरीलाई हराएर जर्मनी एक खेलअगावै दोस्रो चरणमा पुग्न चाहन्छ । यता हंगेरी भने यो खेलमा जीत निकाल्दै अन्तिम १६ मा पुग्ने सम्भावना कायमै राख्न चाहन्छ । यसअघि पहिलो खेलमा हंगेरी स्विट्जरल्यान्डसँग पराजित भएको थियो ।

पहिलो खेलमा स्कटल्यान्डलाई सजिलै हराएको आयोजक जर्मनी समूह ‘ए’मा जर्मनी ३ अंकसहित शीर्ष स्थानमा छ । बुधवार राति हंगेरीलाई पराजित गरेमा जर्मनी अन्तिम १६ मा पुग्नेछ ।

यसैगरी बुधवार मध्यराति स्कटल्यान्ड र स्विट्जरल्यान्ड भिड्नेछन् । १२ः४५ बजे शुरू हुने यो खेलमा स्कटल्यान्ड जित्नैपर्ने दबाबमा छ ।