युरोकपको दुर्लभ तथ्यः प्रशिक्षकभन्दा खेलाडी जेठो

जर्मनीमा जारी युरोकप फूटबल प्रतियोगिता विभिन्न तथ्यका कारण रोचक बनिरहेको छ । एउटा अर्को तथ्यले थप रोचकता थपेको छ ।

घरेलु टोली जर्मनीका मुख्य प्रशिक्षक जुलियन नाङ्गेल्सम्यान आफ्ना खेलाडीभन्दा कम उमेरको रहेको पाइएको छ । फूटबलमा यो निकै दुर्लभ तथ्य हो ।

नाङ्गेल्सम्यान गोलकिपर म्यानुअल नोयरभन्दा एक वर्ष चार महिना कान्छा रहेका छन् । नोयरको जन्ममिति २७ मार्च १९ १९८६ (सन्) र नाङ्गेल्सम्यानको २३ जुलाई १९८७ रहेको छ । 

३६ वर्षीय नाङ्गेल्सम्यान यसअघि जर्मन क्लब बायर्न म्युनिखको प्रशिक्षक थिए । नोयर नाङ्गेल्सम्यानको कार्यकालअघिदेखि नै बायर्नको कप्तान छन् । उमेरले ३८ वर्ष पार गरेका नोयर जर्मन राष्ट्रिय टोलीका पूर्वकप्तान पनि हुन् ।

आयोजक जर्मनीले बुधवार राति ९ः४५ बजे घरेलु टोली जर्मनीले हंगेरीको सामना गर्दैछ । चिरपरिचित प्रतिद्धन्द्धी हंगेरीलाई हराएर जर्मनी एक खेलअगावै दोस्रो चरणमा पुग्न चाहन्छ । यता हंगेरी भने यो खेलमा जीत निकाल्दै अन्तिम १६ मा पुग्ने सम्भावना कायमै राख्न चाहन्छ । यसअघि पहिलो खेलमा हंगेरी स्विट्जरल्यान्डसँग पराजित भएको थियो ।

पहिलो खेलमा स्कटल्यान्डलाई सजिलै हराएको आयोजक जर्मनी समूह ‘ए’मा जर्मनी ३ अंकसहित शीर्ष स्थानमा छ । बुधवार राति हंगेरीलाई पराजित गरेमा जर्मनी अन्तिम १६ मा पुग्नेछ ।

पेपे र रोनाल्डो युरोकपका सबैभन्दा ‘बूढा’ खेलाडी