समलिङ्गी विवाहलाई मान्यता दिने ताइवान र नेपालपछि तेस्रो एसियाली राष्ट्र बन्दै थाइल्यान्ड

बैंकक–थाइल्यान्डको सिनेटद्वारा विवाहसम्बन्धी समानता विधेयक पारित गरेपछि अब देश समलिङ्गी विवाहलाई मान्यता दिने दक्षिणपूर्वी एसियाको पहिलो राष्ट्र बन्ने अल जजिराले जनाएको छ । 

माथिल्लो सदनमा मङ्गलबार उपस्थित १५२ सदस्यमध्ये विधेयकको पक्षमा १३०, विपक्षमा ४ र १८ अनुपस्थित भएसँगै विधेयक बहुमतका साथ पारित भएको हो । 

यो विधेयक अब औपचारिक स्वीकृतिका लागि राजा महा भाजिरालोङ्गकोर्नका समक्ष प्रस्तुत गरिनेछ र शाही राजपत्रमा प्रकाशित भएको १२० दिनपछि लागू हुने अल जजिराले बताएको छ ।

ताइवान र नेपालपछि समलिङ्गी विवाहलाई अनुमति दिने कानून लागू गर्ने थाइल्यान्ड तेस्रो एसियाली मुलुक हुनेछ । 

समलिङ्गी अधिकारकर्मीहरूले थाइल्यान्डको यस कार्यको उच्च प्रशंसा गरेका छन् । 

विधेयकले पुरुष, महिला, पति र पत्नीलाई लैङ्गिक–तटस्थ शब्दमा पुनः नामाकरण गरेको छ र विवाहलाई दुई व्यक्तिहरूबीचको साझेदारीको रूपमा परिभाषित गरेको छ ।  

थाइल्यान्डमा लेस्बियन, समलिङ्गी, उभयलिङ्गी वा ट्रान्सजेन्डर समुदायको जनसङ्ख्या बढ्दो क्रममा रहेपनि अधिकारकर्मीले वर्षौदेखि परम्परागत विश्वासका विरुद्ध लडिरहेका थिए । 

‘हामी इतिहास बनाउन पाउँदा निकै गर्व गर्छौं,’ समलिङ्गी विवाहसम्बन्धी संसदीय समितिका सदस्य प्लाइफाह क्योका सोडलादले भने । 

अल जजिराको रिपोर्टअनुसार विधेयक पारित भएपछि राष्ट्रियसभामा केहीले यो समुदायको समर्थनमा इन्द्रेणी झण्डा फहराउँदै गरेको देखिएका थिए । 

मार्चमा ४१५ सांसदहरूमध्ये केवल १० ले विधेयकविरुद्ध मतदान गरेपछि यो विधेयक तल्लो सदनबाट सर्वसम्मतले पारित भएको थियो ।