तनहुँ, ५ मंसिर – नेपाली कांग्रेसका वरिष्ठ नेता रामचन्द्र पौडेलले परिस्थिति केही अप्ठेरो भएपनि विगतमा जस्तै यसपटक पनि तनहुँबाट आफूले चुनाव जित्ने दाबी गरेका छन् । उनले राजनीतिक संस्कार भएको जिल्लामा उच्छृङ्खल गतिविधि भइरहेको समेत आरोप लगाए ।

चुनाव प्रचारको क्रममा तनहुँको डुम्रेमा लोकान्तरसँग कुरागर्दै तनहु क्षेत्र नम्बर १ बाट प्रतिनिधि सभाका उम्मेदवार कांग्रेस बरिष्ठ नेता पौडेलले विगतमा आफूले गरेका कामका कारण यसपटक पनि चुनाव जित्ने दावी गरेका हुन् । 

पौडेलले वामपन्थी गठबन्धनले दुईतिहाइ ल्याउने कुरा उनीहरुको मृगतृष्णा भएको टिप्पणी गरे । लोकान्तरको एक प्रश्नमा पौडेलले अब कांग्रेसको प्रधानमन्त्रीको उम्मेदवार आफू भएको दावी गरे । ‘प्रधानमन्त्री बनेर देशको सेवागर्न पाउनु पर्ने कुरा संसदमा भएका माओवादी र एमालेले पनि महसुश गरेका छन्’ पौडेलले मुस्कुराउँदै भने । 

पौडेलले चुनावी प्रचारका क्रममा आफूमाथि आक्रमणको प्रयास भएपनि नडराउने प्रतिक्रिया दिए । ‘विगतमा म रोल्पा जाँदापनि दशैंको फुलपातिमा जस्तै बम पड्काइएको थियो, आतंकित बनाउन खोजिएको थियो, बमसंग म डराउदिन’ पौडेलले भने । उनले गोविन्दराज जोशीका कारण आफूलाइै चुनावमा खतरा नरहेको दाबी गरे । 

आफूले निष्ठाको राजनीति गरिरहेको दाबीगर्दै पौडेलले प्रतिष्पर्धी एमाले उम्मेदवारले पैसाको बलमा राजनीति गरिरहेको आरोप लगाए । ‘कसैले म विरुद्ध तल्लो स्तरको गाली गर्दैमा म त्यसरी गालीमा उत्रिन्न’ पौडेलले भने । 
२०४८ सालदेखि लगातार चुनाव जित्ने देशका पाँचजना नेतामा पौडेल पनि एक हुन् । यसपटक पौडेलले साविकमा चुनाव जितेको निर्वाचन क्षेत्रमा केहीभाग हेरफेर भएको छ । 

भ्रष्टाचार अभियोग लागेका गोविन्दराज जोशीले पौडेलविरुद्ध तनहु १ बाट बागी उम्मेदवारी दिएपनि उनको उम्मेदवारी  खारेज भइसकेको छ । पौडेललाई नयाँ शक्ति, राप्रपा लगायतको समर्थन रहेपनि जोशी समर्थकको भोट निर्णायक मानिएको छ । 

यो पनि पढ्नुहोस्

तनहुँका जनताले यसपटक रामचन्द्रजीलाई राजनीतिक विश्राम दिँदैछन् : किसान श्रेष्ठ [भिडियो अन्तर्वार्ता]