काठमाडौं – क्राइस्टचर्चमा भएको भयानक गोलीकाण्डलाई बन्दूकधारीले १७ मिनेटसम्म लाइभस्ट्रीम गरेको पाइएको छ । 

अस्ट्रेलिया प्रहरीले गोली चलाउने व्यक्ति ब्रेन्टन टारान्ट भनी पहिचान गरेको छ । उनी अस्ट्रेलियामा जन्मेका २८ वर्षीय गोरा मानिस हुन् । उनको ट्विटर अकाउन्ट ब्लक गरिएको छ । 

बन्दूकधारीले एक अन्लाइन लिंक दिएर आफ्नो लामो मेनिफेस्टो दिएका छन् । 

प्रहरी कमिस्नर माइक बुशले गोलीकाण्डको फूटेज सामाजिक सञ्जालमा राखिएको विषयमा आफूलाई जानकारी आएको र त्यसलाई हटाउन सबै काम गरिरहेको बताए । 

‘यस्ता कुरा सार्वजनिक स्थानमा राखिन योग्य छैनन् ।’

फेसबूकका अस्ट्रेलिया र न्युजील्यान्ड नीति निर्देशक मिया गार्लिकले क्राइस्टचर्च गोलीकाण्डका भिडियो हटाइएको बताएकी छन् । 

यो भिडियो फूटेज चलाउन खोज्ने वेबसाइट बन्द गर्न काम भइरहेको स्पार्कका व्यवस्थापकीय निर्देशक सिमोन मोउट्टरले बताए । 

भिडियो हेल्मेटमा राखिएको क्यमराबाट खिचिएको हो । त्यसमा बन्दूकधारी मस्जिदको अगाडिको ढोकामा पसेर गोली चलाएको देखिन्छ । उनी मस्जिदभित्र तीन मिनेट रहेको अनि थप गोलीगट्ठा लिनका लागि गाडीमा फर्किएको र

पछि फेरि मस्जिद पसेर फेरि गोली चलाएको देखिन्छ । 

कुल १७ मिनेटको भिडियोको अन्त्यमा बन्दूकधारी तीव्र गतिमा गाडीमा हुँइकिइएको देखिन्छ ।

न्युजील्यान्ड हेराल्डबाट