पोखरा महानगरले वडाबाटै थाल्यो स्वास्थ्य बीमा

पोखरा- पोखरा महानगरपालिकाको वडा कार्यलयबाट स्वास्थ्य बीमा कार्ड वितरण थालिएको छ । वडाभित्र रहेका विपन्न र असहाय नागरिकलाई महानगरपालिका वडा नम्बर १ ले स्वास्थ्य बीमा कार्ड वितरण अभियान शुरू गरेको हो ।

बीमाको पोखरा महागरनपालिकाका उपप्रमुख मञ्जुदेवी गुरुङले कार्ड वितरण गरेर शुभारम्भ गरेकी हुन् । उपप्रमुख गुरुङले महानगरपालिकाले एक वडा एक स्वास्थ्य केन्द्र स्थापना कार्यक्रम ल्याएको बताउँदै नागरिक स्वास्थ्यप्रति महानगरपालिका सचेत रहेको बताइन् ।

उनले अहिलेको प्रमुख आवश्यकता शिक्षा, स्वास्थ्य र रोजगारी रहेको बताउदै महागरनले त्यसलाई प्राथमिकतामा राख्दै त्यही अनुसार ऐन नियम बनाएको बताइन् । गुरुङले नागरिकको स्वास्थ्यलाई ध्यानमा राखेर महानगरले शहरी स्वास्थ्य प्रवर्द्धन केन्द्र समेत सञ्चालनमा ल्याएको बताइन् ।

वडाले विपन्न र असहाय नागरिकको स्वाथ्य बीमाका लागि विनियोजन गरेको १ लाख रुपैयाँबाट वडाभित्रका ४० घर परिवारको स्वाथ्य बीमा गरिएको वडा अध्यक्ष शारदा कुमारी पराजुलीले बताइन् । वडाले एक परिवाको २५ सय रुपैयाँका दरले ४० परिवारको बीमा गरिदिएको हो ।

‘विपन्न परिवारको स्वास्थ्य बीमा गर्ने कार्यक्रम अन्तर्गत वडाले विनियोजन गरेको बजेटबाट स्वास्थ्य बीमा गरेर कार्ड वितरण गरेका छौ,’ उनले भनिन्, ‘एक जनाको कार्डबाट परिवारका पाँच जनाले ५० हजार रुपैयाँ बराबरको उपचार गर्न पाउने छन् ।’

वडाले गरेको स्वास्थ्य बीमा कार्यक्रमबाट २ सय जना लाभाविन्त हुने छन् । वडाले किटान गरेका नागरिकहरूलाई शुक्रवार कार्ड वितरण गरिएको छ ।

पोखरा महानगर स्वास्थ्य महाशाखा प्रमुख हेमन्त शर्मा पौडेलले सरकारले ल्याएको स्वास्थ्य बीमा कार्यक्रममार्फत उपलब्ध सुविधाको उपयोग गर्न आग्रह गरे । उनले नियमित स्वास्थ्य परिक्षण गर्न समेत आग्रह गरे ।

स्वास्थ्य बिमा बोर्ड गण्डकीका संयोजक जीवराज खरेलले कुनै पनि नागरिक स्वास्थ्य उपचारबाट बञ्चित हुन नपरोस भन्ने उद्देश्यले सरकारले कार्यक्रम ल्याएको बताए । उनले ४२ जिल्लामा कार्यक्रम संञ्चालन भैरहेको बताए ।

सरकारले तीन वर्ष अघि शुरू गरेको स्वास्थ्या बीमा कार्यक्रममा कास्कीबाट १ लाख ३ हजारले जनाले स्वास्थ्य बीमा गराइसकेका छन् ।