सिप्रदीयन सहायता संस्थाद्वारा बाढीपीडितलाई राहत वितरण

काठमाडौं- सिप्रदीको सामाजिक संस्था सिप्रदीयन सहायता संस्थाद्वारा हालैमात्र सप्तरी जिल्ला, सप्तकोशी नगरपालिका, फत्तेपुरस्थित बाढी प्रभावित परिवारहरूलाई आधारभूत आवश्यकताका सामाग्रीहरू राहतस्वरूप वितरण गरेको छ ।

सिप्रदीयन सहायता संस्थाको १० जनाको स्वयंसेवक टोलीले सप्तकोशी नगरपालिका वडा नं ६ का २६० घरधनीलाई प्रतिघर २५ केजी चामल, १.५ केजी दाल, १ केजी नुन र १ लिटर खाना पकाउने तेल लगायतका सामाग्रीहरू राहतस्वरूप वितरण गरेको छ । साथै उक्त नगरपालिका वडा नं ७ का ५० घरधनीलाई सोही बमोजिमको राहत सामाग्रीहरू वितरण गरेको छ ।


Advertisement

उक्त राहत सामाग्रीहरू स्थानीय निकायका जनप्रतिनिधिहरू, राजनीतिक व्यक्तित्वहरू साथै सिप्रदीसँग आबद्ध व्यवसायीहरूको उपस्थितिमा वितरण गरिएको हो । यस वर्षको मनसूनी वर्षाको कारणले सप्तकोशी नगरपालिका स्थित त्रियुगा नदी आसपास बसोबास गरिरहेका परिवारहरू धेरै नै प्रभावित भएका छन् । 

गत जुलाई ११, २०१९ देखि शुरू भएको अविरल वर्षाका कारणले विशेषगरी दक्षिणपूर्वी जिल्लाहरू र त्यहाँका महानगरपालिका तथा नगरपालिका लगायतका बस्तीहरू प्रभावित भएका छन् । साथै देशैभरी बाढी पहिरो तथा प्राकृतिक प्रकोपको जोखिम बढिरहेको छ । मनसुनका कारण देशैभरीका ३१ भन्दा धेरै जिल्लाहरू प्रभावित भएका छन् ।


Advertisement

जसका कारण ११,८३९ भन्दा धेरै घरबार विहीन भएका छन् भने ९० भन्दा धेरैले ज्यान गुमाएको पुष्टि भइसकेको छ ।

सिप्रदी सहायता संस्था एक लाभ निरपेक्ष, गैरसरकारी तथा अराजनैतिक सामाजिक संस्था हो । यो संस्था सन् २०१२ देखि कार्यशील रहेको छ । यस संस्थाको स्थापना सिप्रदी ट्रेडिङ प्राइभेट लिमिटेडद्वारा कम्पनीको सामाजिक दायित्वको कार्यान्वयनको लागि गरिएको हो । यस संस्थाले योग्य तर आर्थिक रूपमा विपन्न बालबालिकालाई छात्रवृत्ति प्रदान गर्छ तथा दुर्गम क्षेत्रमा प्रौढ शिक्षाको विकासमा सहयोग गर्दै शिक्षाको क्षेत्रमा सहायता प्रदान गर्ने ध्येय राखेको छ ।

संस्थाले वृद्ध नागरिक, नाबालक टुहुराहरु तथा भिन्न क्षमता भएका व्यक्तिहरूलाई हरतरहबाट सेवा पुर्‍याउने निष्ठा राखेको छ । यसको अलावा संस्थाले प्राकृतिक विपत्ति तथा दैविक प्रकोपबाट पीडित जनताको आपत्कालीन उद्धार, सहयोग तथा पुन:स्थापन सम्बन्धी कार्यमा सहयोग गर्दै आएको छ ।

कमेन्ट गर्नुहोस्