बुटवलका किराना पसलमा अखाद्य वस्तु फेला, अनुगमन समितिले गर्यो नष्ट

बुटवल - बुटवलको बजारमा लेवलबिनाका सामानहरू छ्याप्पछ्याप्ती बिक्री भएको पाइएको छ । खुद्रा किरानादेखि होलसेल पसलहरूमा समेत लेवलबिनाका सामानहरू खुलेआम रूपले बिक्री भएको पाइएको हो ।

बुटवल उप–महानगरपालिका उपभोक्ता हित संरक्षण समितिले गरेको अनुगमनमा किराना पसलहरूमा लेवलबिनाका अखाद्य वस्तुहरू बिक्री भएको भेटिएको छ ।


Advertisement

बुटवलको ट्राफिक चोकमा रहेको चण्डी नामक पसलबाट लेवल नलगाएका ३० हजारभन्दा बढी मूल्य पर्ने विभिन्न उपभोग्य सामान अनुगमन समितिले फेला पारी नष्ट गरेको छ ।


Advertisement

समितिकी संयोजक गोमादेवी आचार्यको संयोकत्वमा गएको अनुगमन समितिले काजु, किसमिस, बदाम, ओखरको घाझि, चना लगाएका सामानहरू लेवल नलगाई बिक्री गरेको भेटाएपछि नगरपालिकाले त्यसलाई नष्ट गरेको हो ।

समितिले उपभोक्ताको स्वास्थ्यलाई ख्याल गर्दै नियमित रुपमा बजार अनुगमन गर्ने बताएको छ ।

‘हामीले उपभोक्ताको स्वास्थ्यलाई ध्यानमा राख्दै बजार अनुगमनलाई तीव्र बनाएका छौँ,’ समितिकी संयोजक गोमादेवी आचार्यले भनिन्, ‘चाडपर्व लक्षित भन्दापनि यो अनुगमन वर्षभरि नै हुनेछ ।’

त्यस्तै चण्डी किराना पसलले उप–महानगरपालिकामा नवीकरण नगरेको तथा बिलविजक स्पष्ट रुपमा नकाटेको समेत अनुगमनको क्रममा भेटिएको छ । अनुगमन समितिले बुटवलको सुख्खानगरमा रहेको अर्घाखाँची मन्सिला किराना पसल पनि अनुगमन गरेको छ ।

‘त्यसैगरी सुख्खानगरमै रहेको पाण्डे ग्याँस सप्लायर्समा पनि अनुगमन गरिएको छ, अनुगमनका क्रममा लेवलबिनाका सामानहरू, बिलविजक ठीक नभएको समेत भेटिएको छ । उहाँहरूलाई सचेत बनाउने काम पनि हामीले गरेका छौँ,’ वाणिज्य कार्यालय भैरहवाका प्रमुख रुद्रप्रसाद ज्ञवालीले भने ।

अनुगमनका क्रममा जफत गरिएका सामानहरू बुटवल उप–महानगरपालिकाका अनुगमन शाखा प्रमुख टोपलाल शर्मा, उपभोक्ता हित संरक्षण मञ्च रुपन्देहीका उपाध्यक्ष तेजकुमार पाठक, खाद्य कार्यालय भैरहवाका पदमराज भुसाल, गुणस्तर तथा नापतौल कार्यालयका प्रकाश बस्नेत, बुटवल उप–महानगरपालिका वडा नं. ४ का अध्यक्ष टंक पराजुली, ईलाका प्रहरी कार्यालय बुटवलका प्रहरी नायव निरीक्षक कृष्ण बेलबासेको रोहवरमा नष्ट समेत गरिएको थियो ।

 

कमेन्ट गर्नुहोस्