काठमाडौं – बलात्कारपछि हत्या गरेको अभियोगका दोषीलाई प्रहरीले १९ वर्षपछि पक्राउ गरेको छ ।

झापाको तत्कालीन चन्द्रगढी–३ का लिलाराज गौतमलाई प्रहरीले अमेरिकाबाट झिकाएर बुधवार बिहान त्रिभुवन अन्तर्राष्ट्रिय विमानस्थलमा पक्राउ गरेको नेपाल प्रहरीका प्रवक्ता प्रहरी नायव महानिरीक्षक (डीआईजी) विश्वराज पोखरेलले बताए ।

‘१९ वर्षअघि हत्या गरी फरार रहेका गौतमलाई प्रहरीले इन्टरपोलमार्फत पक्राउ गर्न पत्राचार गरेको थियो,’ डीआईजी पोखरेलले लोकान्तरसँग भने ।

के थियो घटना ?

विक्रम संवत् २०५७ असोज २९ गते राति हत्यारा लिलाराज गौतम, मनोज खड्का र सिताराम बस्नेतले झापाको चन्द्रगढी–३ बस्ने सन्ध्या राजवंशीलाई बलात्कार गरी घाँटी थिचेर हत्यापछि नजिकैको चारआली जंगलको रुखमा झुण्ड्याएका थिए ।

घटनाको अर्को दिन २०५७ असोज ३० गते राजवंशीका बुवा राजकुमार राजवंशीले जिल्ला प्रहरी कार्यालय झापामा घटनाबारे जोहरी दिएका थिए ।

हत्यारा गौतमलाई जिल्ला अदातलत झापाले विक्रम संवत् २०५८ कात्तिक २१ गते सफाइको फैसला सुनाएको थियो । २०५८ चैत २८ गते जिल्ला अदातलको फैसला उपर नेपाल सरकारले पुनरावेदन अदालत इलाममा पुनरावेदन परेको थियो । पुनरावेदनले पनि जिल्ला अदालतको फैसलालाई सदर गरेको थियो ।

फैसला चित्त नबुझी सर्वाेच्च अदालतमा मुद्दा परेपछि २०६६ भदौ २९ गते आरोपी लिलाराज गौतम समेतलाई सर्वोच्चले जन्मकैदको फैसला गरेको थियो । त्यसपछि उनी फरार थिए ।

इन्टरपोलमार्फत यसरी झिकाइए

फरार रहेका दोषी लिलाराज गौतमबारे विक्रम संवत् २०६४ असोज २६ गते प्रहरी प्रधान कार्यालय केन्द्रीय अनुसन्धान ब्यूरोबाट इन्टरपोलमा पत्राचार भएपछि उनका नाममा २०७४ मंसिर १२ गते ‘रेड नोटिस’ जारी भएको थियो ।

नोटिस जारी भएपछि सन् २०१८ जनवरी ५ तारिखमा उनी अमेरिकाको वासिङ्गटनमा देखिएको सूचना इन्टरपोलमा आएको थियो । २०१८ फेब्रुअरी १३ मा अमेरिकाको प्रहरीले उनलाई पक्राउ गरेर ‘डिपार्टमेन्ट अफ होमल्याण्ड सेक्युरिटी’को हिरासतमा राखेको थियो ।

गौतमलाई अमेरिकाको प्रहरीले नेपाल प्रहरीको आग्रहमा यूएस अध्यागमन जज्ले सन् २०१८ सेप्टेम्बर ५ मा गौतमलाई नेपाल पठाउने निर्णय गरेपछि उनलाई नेपालस्थित अमेरिकी दूतावासको समन्वयमा नेपाल फिर्ता ल्याएको प्रहरीले जनाएको छ ।