सुर्खेत - कर्णाली प्रदेशका हिमाली एक जिल्ला र पहाडी एक जिल्लामा कात्तिकको चिसो सिरेटोसँगै चुनावी सरगर्मी बढेको छ ।

मंसिर १४ गते हुने उपनिर्वाचनका लागि दलहरु चुनावी प्रचार प्रसारमा होमिएका छन् । हुम्लाको खार्पुनाथमा उपाध्यक्षका लागि र सल्यानको कुमाख गाउँपालिका–५ का वडाध्यक्षका लागि उपनिर्वाचन हुँदैछ ।

हुम्लाको खार्पुनाथकी उपाध्यक्ष सिन्धु हमाल शाहीको असार ३ गते कर्णाली नदीमा जिप दुर्घटनामा मृत्यु भएको थियो ।

खार्पुनाथका पाँचवटा मतदान केन्द्रमा उपाध्यक्ष पदका लागि मतदान हुने जिल्ला निर्वाचन कार्यालयका निमित्त जिल्ला निर्वाचन अधिकारी जगदीश शाहीले जानकारी दिए ।

‘खार्पुनाथ गाउँपालिकामा ३२ सय ८७ मतदाता छन् । मृतक शाही नेपाली कांग्रेसबाट निर्वाचित जनप्रतिनिधि हुन् । उनले एक हजार १८ मत ल्याउँदा उनकी प्रतिद्वन्दी नेकपा एमालेकी रूपा शाहीले आठ सय ३६ मत ल्याएकी थिइन्,’ उनले भने, ‘यहाँका पाँच मतदानस्थलमा मतदान हुनेछ ।’

सल्यानको कुमाख गाउँपालिका–५ का वडाध्यक्ष हरिप्रकाश बुढाथोकी जिल्ला समन्वय समितिको उपप्रमुख भएपछि यहाँ वडाध्यक्षको पद रिक्त थियो ।

उनी तत्कालीन नेकपा माओवादीबाट निर्वाचित भएका थिए । यहाँ एक मतदानस्थल रहेको सल्यानका जिल्ला निर्वाचन अधिकारी हरिबहादुर बुढाथोकीले जानकारी दिए ।

यहाँ उपनिर्वाचनका लागि ३३ सय ८७ मतदाता सहभागी हुन पाउनेछन् । तत्कालीन वडाध्यक्षले सात सय ८८ मत ल्याएर विजयी भएका थिए ।

उनका प्रतिद्वन्दी तत्कालीन नेकपा एमालेका अमृतबहादुर शाहले दुई सय २९ मत पाएका थिए भने नेपाली कांग्रेसका उम्मेदवार खड्कबहादुर बोहराले एक सय ८० मत पाएका थिए ।

उम्मेदवार छान्न सकस

दुई जिल्लाका दुवैवटा स्थानीय तहमा उम्मेदवार छान्नुपर्ने भएपनि नेकपा र काँग्रेसलाइ उम्मेदवार छान्न सकस परेको छ । खार्पुनाथ गाउँपालिकाको उपाध्यक्षका लागि कांग्रेसबाट पाँचजना आकांक्षी देखिएका छन् ।

प्रत्येक वडाबाट उम्मेदवारको सिफारिस मागिएको हुम्लाका पार्टी सभापति जयपति रोकायाले जनाए ।

उता नेकपा पनि उम्मेदवार टुंग्याउने अन्तिम कसरतमा रहेको नेकपाका जिल्ला अध्यक्ष लालकेस जैसीले जनाए । सल्यानमा पनि दलहरूले उम्मेदवारी टुंगो लगाउन सकेका छैनन् । तर चुनावी कार्यक्रम भने सञ्चालन गरिरहेका छन् ।

‘सीमित पदका लागि मात्रै चुनाव भएको र चुनावमा स्थानीय कार्यकर्ताको आकर्षण बढेका कारण उम्मेदवार बन्न चाहनेको नाम टुंग्याउन सकिएको छैन,’ नेकपाका हुम्लाका एक नेताले भने, ‘अबको केही दिनमा टुंगो लाग्छ होला ।’

यता दुवै दलले आफ्नो दलको जित सुनिश्चित रहेको दाबी गर्दै आइरहेका छन् । हुम्लामा पहिले काँग्रेसले जितेको र अहिले पनि आफुले जित्ने दाबी गरिरहेका बेला नेकपाले भने दुवै दल एक भइसकेका कारण जित आफ्नो निश्चित भएको दाबी गर्दै आइरहेको छ ।

सल्यानमा पूर्व माओवादी पहिलो, नेकपा दोश्रो र नेपाली काँग्रेस तेश्रो स्थानमा भएको जिल्ला नेतृत्व दाबी गर्दै आइरहेको छ ।  विगतको मत परिणाम हेर्दा नेकपाको दाबीलाई नकार्न नसकिने उनीहरुको दाबी छ ।