कलेजमा तालाबन्दी गर्दासमेत प्रशासनले असुलेको बढी शुल्क फिर्ता नगरेपछि चिकित्सा शिक्षा अध्ययनरत विद्यार्थी अनशन बस्न बाध्य भएका छन् । बढी शुल्क फिर्ताको माग गर्दै १६ दिनदेखि आन्दोलित भैरहवास्थित युनिभर्सल कलेज अफ मेडिकल साइन्स शिक्षण अस्पतालका विद्यार्थीले शुक्रबारबाट रिले अनशन थालेका हुन् । 

अतिरिक्त शुल्क फिर्ताका लागि १४ कात्तिकदेखि आन्दोलन गर्दा पनि कलेज प्रशासनले सुनुवाइ नगरेपछि युनिभर्सलका विद्यार्थीले रिले अनशन थालेको चिकित्सा शिक्षा संघर्ष समितिका केन्द्रीय संयोजक मिलन गैरेले बताए । विद्यार्थीले गत सोमबारदेखि कलेज प्रशासन, लेखा, प्रधानाध्यापक तथा सहायक प्रधानाध्यापक कक्षमा तालाबन्दी गरेका छन् । 

लाखौँ रुपैयाँ खर्चेर मेडिकल शिक्षा अध्ययनरत विद्यार्थी कलेजको अन्यायकै कारण परीक्षाको तयारीसमेत छाडेर अनशन बस्न बाध्य हुन् । चिकित्सा शिक्षाशास्त्र अध्ययन संस्थान आइओएमले एमबिबिएस पहिलो र दोस्रो वर्षका विद्यार्थीको वार्षिक परीक्षा १९ मंसिरदेखि तोकेको छ । यसअघि २१ कात्तिकदेखि हुने गरी तालिका प्रकाशन गरेकोमा विद्यार्थीको आन्दोलनका कारण सरेको हो । तर, बढी उठाएको शुल्क फिर्ता वा समायोजन नभए १९ मंसिरदेखि तोकिएको परीक्षामा पनि सहभागी नहुने विद्यार्थीले बताएका छन् । 

शुल्क फिर्ताको आन्दोलनमा युनिभर्सल मात्रै होइन देशभरका मेडिकल कलेजका विद्यार्थी आन्दोलनमै छन् । पोखराको गण्डकी मेडिकल कलेजमा दुई महिनादेखि ताला लगाएर विद्यार्थीले दबाब दिएका छन् । चितवन मेडिकल कलेजमा पनि तीन दिनअघि ताला लगाएका छन् ।  नयाँ पत्रिकामा खबर छ ।