कालिकोट जिल्लाको पलाता गाउँपालिकाका अध्यक्ष लक्ष्मण बहादुर बमलाई नेकपा कालिकोटले निलम्बन गरेको छ । नेकपा कालिकोटका जिल्ला कमिटी सदस्य रहेका बमलाई पार्टीबाट छानविन गर्नका लागि भन्दै निलम्बन गरिएको हो ।

अध्यक्ष बमलाई नेकपाले गाउँपालिकाको अध्यक्ष भएपछि आर्थिक अनियमिता गरेको, पार्टीको निर्णय नमानेको जस्ता आरोप लगाउँदै निलम्बन गरिएको बताइएको छ ।

‘उहाँमाथि विभिन्न आरोपहरु लागेको छ, ती आरोपको छानबिनका लागि निलम्बन गरिएको हो,’ नेकपा कालिकोटका सचिव नगेन्द्र शाही नेशनलले लोकान्तरसँग भने,  ‘पार्टी हितविपरीत आर्थिक अनियमिता गरेको लगायतका आरोप छन् ।’

छानविन समितिको प्रतिवेदन के कस्तो आउँछ, त्यसपछि मात्रै साधारण सदस्यबाटै निलम्बन गर्ने वा नगर्ने भन्ने बारेमा निष्कर्ष आउनेछ ।

उनीमाथि छानविन गर्न जिल्ला कमिटी सदस्य विष्णु विकको संयोजकत्वमा ३ सदस्यीय छानबिन समिति गठन गरिएको थियो । समितिका अन्य सदस्यमा नेपाल कम्युनिस्ट पार्टी (नेकपा) जिल्ला सदस्य कृष्णप्रसाद आचार्य र टेकबहादुर बुढा रहेका छन् ।

छानबिन समितिको प्रतिवेदनअनुसार नै पार्टीले अध्यक्ष बममाथि थप प्रक्रिया अगाडि बढाउने पार्टी सचिव शाहीले बताए । ‘उनिमाथि जनस्तर र पार्टी भित्रैबाट केही आरोप लागेका छन,’ उनले भने, ‘छानबिन समितिको प्रतिवेदनअनुसार नै अध्यक्ष बमलाई थप कारबाही वा फुकुवा हुने भन्ने कुरा तय हुनेछ ।’

अध्यक्ष बममाथि कारबाहीको माग गर्दै पलाता गाउँपालिकाबाट जिल्ला कमिटिमा प्रतिनिधित्व गर्ने एघार जना सदस्यमध्ये १० जनाले इन्चार्ज एवम मुख्यमन्त्री महेन्द्रबहादुर शाहीलाई लिखित उजुरी समेत दिएका थिए ।

‘आफ्नै घरमा गाउँपालिकाको कार्यालय राखेर भाडा असुल्दै अध्यक्ष' शीर्षकमा लोकान्तरमा समाचार आइसकेपछि पार्टी नेतृत्वलाई छानविन गर्न दबाब परेको थियो,’ पलाताका एक नेताले भने, ‘समाचारको आधार अनि जनस्तरको गुनासोलाई आधार मान्दै पार्टीले उक्त कदम उठाएको हो ।’ 

अध्यक्ष बममाथि सम्पत्ति बढि आर्जेको, कार्यदलमा मनमानी गरेको, गाउँपालिकामा मनोमानी तरिकाले निर्णय गर्ने गरेकोजस्ता गम्भीर आरोपहरु लागेका थिए ।

‘अध्यक्ष बमले गाउँ कार्यपालिकालाई समेत केही जानकारी नदिने गरेको आरोप लागेको छ,’ नाम उल्लेख नगर्ने शर्तमा एक कार्यपालिका सदस्यले भने, ‘गाउँपालिकाका प्रवक्तालाई माइनयूट पनि हेर्न नदिइएको गुनासो आएको छ ।’

यता, अध्यक्ष बमले आफु पार्टीबाट निलम्बनमा परेपनि जनताबाट निलम्बनमा नपरेको बताए । ‘पार्टीले निलम्बन गरेको होला, तर म जनताबाट निलम्बनमा परेको होइन,’ बमले भने, ‘आफुले आर्थिक अनियमिता नगरेको बरु पार्टीसँग सल्लाह नगरी केही जनमुखी काम गरेकोले निलम्बन गरिएको हुन सक्छ ।’

उनले यदि अनियमिता गरेको प्रतिवेदन छानविन समितिले निकाल्यो भने आफु पार्टी र सत्ताबाटै राजिनामा दिने बताए । नेकपाले कात्तिक २९ गते उक्त छानविन टोली बनाएको थियो ।