प्रदेशका हरेक घर अभावरहित हुनुपर्छ– मुख्यमन्त्री पौडेल

प्रदेश नं ३ का मुख्यमन्त्री डोरमणि पौडेलले प्रदेशका हरेक घर अभावरहित हुनुपर्ने बताएका छन् । उनले नागरिकलाई खुशी बनाई समृद्धिको यात्रा तय गरिने उल्लेख गरे ।

मकवानपुरको भीमफेदी गाउँपालिकाको कोगटे–इपा क्षेत्रको अनुगमन भ्रमणपछि स्थानीयवासीसँग शुक्रवार कुरा गर्दै मुख्यमन्त्री पौडेलले सरकार हरेक नेपालीको मुहारमा मुस्कान ल्याउन उद्यत रहेको बताए ।


Advertisement

उनले प्रदेशका हरेक घरमा खानेपानीको धारो हुनुपर्ने तथा हरेक घरमा बिजुली जोडिनुपर्ने उल्लेख गरे । 'हरेक घरका बालबालिकाले पढ्ने वातावरण पाउनुर्प', उनले भने ।

मुख्यमन्त्री पौडेलले प्रदेश सरकारले विकासका कुनै पनि पूर्वाधारबाट कसैलाई पनि बञ्चित गर्न नहुने धारणा राखे ।


Advertisement

उनले सरकारले जिल्लाको विकासमा डेढ अर्ब रुपैयाँभन्दा बढी लगानी गरेको उल्लेख गरे ।

डेढ वर्षभित्र हेटौंडामा चिकित्साशास्त्रको अध्ययन सञ्चालन गर्ने गरी शिक्षण अस्पतालको शुरुआत भइसकेको, प्रतिवर्ष दुई हजार ५०० प्राविधिक जनशक्ति उत्पादन गर्ने गरी प्राविधिक महाविद्यालय निर्माणको काम भइरहेको उनले जानकारी दिए ।

'कृषि उत्पादन वृद्धि गर्न सरकारले सिँचाइ, मलखाद, बीउ बिजन आदिको उचित व्यवस्थापन गर्नेछ', मुख्यमन्त्री पौडेलले भने ।

पशुपालन, तरकारी खेतीजस्ता रोजगारमूलक कृषिका लागि अनुदान उपलब्ध गराउनुका साथै उत्पादित कृषिउपजको भण्डारणका लागि शीतभण्डार निर्माण र बजारीकरणको व्यवस्था गरिएको उनले बताए ।

कार्यक्रममा जिल्ला समन्वय समितिका प्रमुख रघुनाथ खुलालले सङ्घीयतापछि स्थानीय तहको निर्वाचन र प्रदेश सरकारको गठनपछि जिल्लाका विकट क्षेत्र पनि विकासको मूलधारमा समाहित भएको उल्लेख गरे ।

उनले सरकारको योजनामा स्थानीय चासो र चिन्ता आवश्यक रहेको बताए । भीमफेदी गाउँपालिकाका अध्यक्ष हिदम लामाले गाउँपालिकाका कुनै पनि कुनालाई विकासले सुगम बनाइने उल्लेख गरे ।

उनले प्रदेश सरकारको साथ रहे गाउँपालिकालाई समृद्ध बनाउन सम्भव रहेको धारणा राखे ।

कमेन्ट गर्नुहोस्