भारततर्फ नेपालको निर्यात बढेको छ । चालू आवको ३ महिनामा भारततर्फ ३५ दशमलव ८ प्रतिशतले निर्यात बढेको हो ।

नेपाल राष्ट्र बैंकले भारतसँगको व्यापार घाटामा कमी आई पछिल्ला ३ महिनामा निर्यात बढेको जनाएको छ । 

चीन र अन्य मुलुकसँग भने निर्यात घटेको छ । गत आर्थिक वर्षमा भारतसँग नेपालको व्यापार घाटा ७ खर्ब ६४ अर्ब ३० करोड रुपैयाँ थियो । चालू आवमा चीनतर्फ १९ दशमलव ९ र अन्य मुलुकतर्फ ११ दशमलव ७ प्रतिशतले निर्यात घटेको भएपनि यस अवधिमा कूल १४ दशमलव ४ प्रतिशतले निर्यातमा वृद्धि भएको छ ।

आर्थिक वर्ष २०७६/७७ को असोज मसान्तसम्म भारततर्फ २७ अर्ब १७ करोड रुपैयाँ बराबर निर्यात भएको हो । भारततर्फ नेपालले पाम तेल, अलैंची, आयुर्वेदिक औषधि, जुटका सामान, धागो (पोलिस्टर तथा अन्य) वस्तुको निर्यात बढेको छ भने चीन र अन्य मुलुकतर्फ जस्तापात, जुस, तयारी पोसाक, ऊनी गलैंचा, तार लगायतका वस्तुको निर्यात घटेको छ ।

३ महिनामा कूल वस्तु आयात १० दशमलव शून्य ३ प्रतिशतले घटेर ३ खर्ब ३४ अर्ब ९५ करोड पुगेको छ । अघिल्लो वर्षको सोही अवधिमा यस्तो आयात ४३ दशमलव ०६ प्रतिशतले बढेको थियो । वस्तु आयात गरिने मुलुकका आधारमा भारत तथा अन्य मुलुकबाट भएको आयात क्रमशः १२ दशमलव ०२ प्रतिशत र १९ दशमलव ०१ प्रतिशतले घटेको छ भने चीनबाट भएको आयात ११ दशमलव ०६ प्रतिशतले बढेको छ । 

वस्तुगत आधारमा कच्चा पाम तेल, हटरोल सिट, अन्य मेशिनरी तथा पाटपुर्जा, विद्युतीय उपकरण, सोलार प्यानललगायतका वस्तुको आयात बढेको छ भने हवाईजहाज तथा पार्टपुर्जा, एमएस बिलेट, पेट्रोलियम पदार्थ, सुन, यातायातका उपकरण तथा पार्टपुर्जा लगायतका वस्तुको आयात घटेको छ । 

आव २०७६/७७ को ३ महिनासम्ममा कूल वस्तु व्यापार घाटा १२ प्रतिशतले संकुचन भई ३ खर्ब ७ अर्ब ७८ करोड रहेको छ । समीक्षा अवधिमा निर्यात–आयात अनुपात ८ दशमलव ०१ प्रतिशत पुगेको छ । अघिल्लो वर्षको सोही अवधिमा सो अनुपात ६ दशमलव ०४ प्रतिशत रहेको थियो ।