बुटवल- बुटवलमा सत्तारूढ दल नेकपा निकट विद्यार्थी संगठन अनेरास्ववियुले नेपाली भूमि फिर्ता गर्न माग गर्दै बुटवलमा प्रदर्शन गरेको छ । नेपालको भू–भागलाई भारतले आफ्नो नयाँ नक्सामा समावेश गरेपछि त्यसको विरोधमा विभिन्न कलेजमा अध्ययनरत अखिलका विद्यार्थीहरू प्रदर्शनमा उत्रिएका हुन् । 

अनेरास्ववियुका विद्यार्थीहरूले ‘गो ब्याक इन्डिया, भारतीय विस्तारवाद मुर्दावाद, हाम्रो नेपाली भूमि फिर्ता गर, लिपुलेक कालापनी र लिम्पियाधुरा हाम्रो हो, मिचिएको हाम्रो भूमि फिर्ता गर’ जस्ता नारा लेखिएका पर्चा पम्पलेटसहित नाराबाजी गरी प्रदर्शन गरेका थिए । 

लुम्बिनी वाणिज्य क्याम्पस देविनगरबाट शुरू भएको प्रर्दशन राजमार्ग चौराह हुँदै मिलनचोकमा पुगेर कोणसभामा परिणत भएको थियो । कोणसभामा बोल्दै अनेरास्ववियु लुम्बिनी वाणिज्य क्याम्पसका इन्चार्ज तथा अनेरास्ववियु जिल्ला सदस्य प्रकाश पराजुलीले नेपालको एक इन्च भूमि पनि भारतीय पक्षले मिच्न नपाइने भन्दै नेपालको भूमि तत्काल नेपाललाईनै फिर्ता गर्न आग्रह गर्दौ अन्यथा नेपालीहरु पनि अब चुप लागेर नबस्ने बताए ।

अनेरास्ववियु जिल्ला सदस्य दीपक चापगाईंले आफ्नो पार्टी सरकारमा भए पनि यस्तो संवेदनशील विषयमा आफूहरूले सधै प्रतिपक्षको भूमिका निवार्ह गर्ने बताए । उनले भारतीय पक्षलाई आफनो नक्सा सच्याउन समेत माग गरे । सभामा बोल्दै अनेरास्ववियु जिल्ला सचिव साजन भण्डारीले भारतीय विस्तारवादको घोर निन्दा गर्दै अब यो प्रदशर्न यहीमात्र सीमित नभएर पूर्व मेचीदेखि पश्चिम महाकालीसम्म पुग्ने र भारतीय विस्तारवादलाई घुँडा टेकाउने बताए ।