प्रदेश ५ को प्रदेशसभा सदस्यहरुले व्याप्त लैंगिक हिंसाका घटना रोक्न अभियान चलाउने प्रतिवद्धता जनाएका छन् । चालु आर्थिक वर्षलाई लैंगिक हिंसा विरुद्धको वर्ष अभियानका रुपमा प्रचारमुखी, दवावमुखी र परिणाममुखी कार्यक्रम गरेर हिंसाको अनुपात घटाउने उनीहरुले दावी गरे ।

प्रदेशसभा सचिवालयले सोमबार बुटवलमा आयोजना गरेको लैंगिक हिंसा विरुद्धको अभियानमा प्रदेशसभा सदस्यहरुको भूमिका विषयक कार्यक्रममा बोल्दै उनीहरुले लैंगिक हिंसामा महिला हिंसा अधिकांश रहेकाले त्यसलाई हटाउन अभियान चलाउने बताए । यसकालागि ३ तहका सरकारबीच लैंगिक योजना निर्माण, बा“डफा“ड र कार्यान्वयनमा समन्वय गर्ने तथा नागरिक समूह र गैरसरकारी संस्थाको परिचालन र अभियानलाई परिणाममुखी बनाउने उनीहरुले बताए ।

उपसभामुख कृष्णी थारुले राज्यबाट न्याय, सुरक्षा र संरक्षणको ग्यारेण्टी नहुदा हिंसा भोगेर पनि कसैलाई नबताउने अवस्था हुन नहुने बताइन् । प्रदेशमा महिलाको छुट्टै संरचना नहुदा महिलाका मुद्दा उठाउन र सुनुवाई गर्न समस्या रहेको बताउदै उनले भनिन्, ‘प्रदेशमा छुट्टै महिला कार्यालय वा तदर्थ समिति खोल्न पनि सरकारलाई आग्रह गर्ने छौं ।’

आन्तरिक मामिला तथा कानुन समिति सभापति दामा शर्माले लैंगिकता र महिला हिंसाका मुद्दा सम्बोधन गर्न आवश्यक ऐन, नीति, संरचना र बजेटको व्यवस्था गर्न सरकारलाई आग्रह गर्ने बताइन् । त्यसकालागि योजना तर्जुमादेखि बजेट निर्माण र कार्यान्वयन तहसम्म निगरानी र अनुगमन बढाउने उनले बताइन् । ‘महिलाका कुरा महिलाले मात्रै उठाउनुपर्छ भन्ने छैन । पितृसत्ताको खोल फालेर यस अभियानमा पुरुष प्रदेश सभा सदस्यहरुलाई पनि लगाउनेछौं ।’ उनले भनिन् । 

पूर्वाधार विकास समिति सभापति आशा स्वर्णकारले योजनाले लक्षीत वर्ग भेटाउन र दिगो एवं भरपर्दो माध्ययमबाट लैंगिक विकास गरेर महिला हिंसा घटाउने बताइन् । समयस“गै हिंसाका स्वरुप फेरिएकाले त्यसअनुसार सम्बोधन गर्ने नीति, कार्यक्रम  र कार्यान्वयनको अवस्था ल्याउन सबै प्रदेश सभा सदस्यहरुले भूमिका बढाउने उनले दावी गरिन् । कार्यक्रमका अध्यक्ष तथा सामाजिक विकास समिति सभापति दीर्घनारायण पाण्डेले लैंगिक हिंसा महिलाको मात्रै समस्या नभएर समाज र प्रदेशकै समस्याका रुपमा उठाउने बताए । जनसंख्यामा ५० प्रतिशत धेरै महिलाहरु हिंसामा बाच्नुपर्ने अवस्था रोक्न जनचेतना, शिक्षा, रोजगारी र पैरवीका कार्यक्रम गर्ने उनले बताए ।

कार्यक्रममा पत्रकार अमृता अनमोलले प्रदेशमा लैंगिक हिंसा र महिला सशक्तिकरणको अवस्था र प्रदेश सभा सदस्यहरुको भूमिकाबारे कार्यपत्र प्रस्तुत गरेकी थिइन् ।