विप्लव समूहले हिंसा त्यागेर वार्तामा आउनुपर्छ– पहाडी

प्रकाश आचार्य
प्रकाश आचार्य

आचार्य लोकान्तरका प्रदेश ५ प्रतिनिधि हुन् ।

मानव अधिकार तथा शान्ति समाजका संस्थापक सभापति कृष्ण पहाडीले नेत्रविक्रम चन्द ‘विप्लव’ नेतृत्वको समूहलाई वार्ताबाटै निकास खोज्न आग्रह गरेका छन् । 

नेपाली जनता द्वन्द्व र हिंसाबाट आजित भइसकेको भन्दै उनले हिंसा त्यागी वार्ताबाटै निकास खोज्नुपर्ने बताए ।


Advertisement

मानव अधिकार तथा शान्ति समाज रूपन्देहीले आइतवार बिहान बुटवलमा गरेको पत्रकार भेटघाट कार्यक्रममा बोल्दै पहाडीले भने, ‘विप्लव समूह सरकारका गतिविधिबाट रूष्ट जनतालाई भजाएर राजनीति गर्दैछ । त्यस्तै सत्तापक्षले विप्लवलाई पेलेर सत्ता लम्ब्याउन खोजेको देखिँदैछ । दुवैको गतिविधि ठीक छैन, राज्यले वार्ताको ढोका बन्द गर्नुहुँदैन ।’ 

उनले थपे, ‘वार्तामा ल्याउन नागरिक समाजले पहल गर्नुपर्छ, जनताका गुनासो राज्यले सम्बोधन गरिनुपर्छ ।’


Advertisement

लोकतन्त्रमा धमिरा लाग्दै गएकाले यसलाई जोगाउने काम राज्यको भएको पहाडीले बताए । उनले भने, ‘लोकतन्त्रमा धमिरा, रोग र ग्रहण लाग्दैछ, देशमा संकट बढ्दै गएको छ, द्वन्द्व चर्कियो, यसलाई जोगाउन जाग्नुपर्छ ।’ 

पहाडीले खर्चिलो निर्वाचन प्रणालीले राज्यको तीनवटै तहमा भ्रष्टचार बढ्दै गएको बताए । राज्यले दृढ इच्छाशक्ति लिएर भ्रष्टचारीलाई कारवाही गर्नुपर्ने उनको भनाइ छ ।

पहाडीले ठूलो अभियानका साथ मनाउन लागिएको नेपाल भ्रमण वर्षलाई सफल बनाउनुपर्ने पनि बताए । त्यसका लागि पर्यटकरू आउन शान्तिपूर्ण वातावरण हुनुपर्नेमा उनको जोड थियो ।

शान्ति समाजका सभापति उत्तम पुडासैनीले देशमा भ्रष्टचार मौलाएकाले यसलाई नियन्त्रण गर्नु राज्यको दायित्व भएको बताए । 

समाजका वरिष्ठ उपसभापति गोविन्द खनालले प्रदेश ५ मा भ्रष्टचारले जरा गाडेको बताए । 

दुई दिनसम्म प्रदेश नम्बर ५ को दाङमा चलेको शान्ति समाजको २२ औं राष्ट्रिय परिषद् बैठकले लागू औषधको दुर्व्यसन, भ्रष्टचार, सीमा अतिक्रमण रोक्न विभिन्न कार्यक्रमहरू गर्दै जाने कार्ययोजना समेत अगाडि सारेको छ । 

कमेन्ट गर्नुहोस्