राष्ट्रिय सभाको आसन्न निर्वाचनका लागि प्रदेश २ मा पनि नेपाल कम्युनिस्ट पार्टी (नेकपा) र राष्ट्रिय जनता पार्टी (राजपा) का उम्मेदवारहरूले उम्मेदवारी मनोनयन दर्ता गराएका छन् ।

आगामी माघ ९ गते हुन लागेको निर्वाचनका लागि प्रदेश २ मा नेकपा र राजपाले चुनावी तालमेल गरेका छन् । दुवै दलले २/२ सीट बाँड्ने गरी चुनावी तालमेल गरेका हुन् ।

नेकपाका उम्मेदवारहरू तुलसा दाहाल र राधेश्याम पासवानले निर्वाचन अधिकृतको कार्यालय जनकपुरमा पुगेर आइतवार उम्मेदवारी मनोनयन दर्ता गराए ।

यस्तै राजपा उम्मेदवारहरू मृगेन्द्रसिंह यादव र शेखर सिंहले पनि उम्मेदवारी मनोनयन दर्ता गराएका छन् ।

उम्मेदवारी दर्ताका लागि उम्मेदवारहरू माला पहिरिएर जुलुससहित निर्वाचन अधिकृतको कार्यालय पुगेका थिए ।

उम्मेदवारी दर्तापछि दुवै दलका उम्मेदवारले संयुक्त फोटो समेत खिचाएका थिए ।

राष्ट्रिय सभामा आगामी फागुन २० मा रिक्त हुने १९ सीटमध्ये १८ सीटका लागि आगामी माग ९ गते निर्वाचन हुँदैछ ।

एक सदस्य भने राष्ट्रपतिले मनोनित गर्नेछिन् ।