भारतमा निर्भया बलात्कारका दोषी मुकेश सिंहको दया निवेदन राष्ट्रपतिद्वारा अस्वीकार

भारतका राष्ट्रपति रामनाथ कोविन्दले निर्भया सामूहिक बलात्कारका एक दोषी मुकेश सिंहले दायर गरेको दया निवेदन (मर्सी प्ली) अस्वीकार गरेका छन् । राष्ट्रपतिको निर्णय राष्ट्रपति भवनले केन्द्रीय गृह मन्त्रालयलाई पठाएको छ ।

गृह मन्त्रालयले शुक्रवारै मुकेश सिंहको दया निवेदन राष्ट्रपतिलाई पठाउँदै अस्वीकार गर्न सिफारिश गरेको अधिकारीहरूले बताए । 


Advertisement

सन् २०१२ मा निर्भयाको सामूहिक बलात्कार र हत्या गरेकोमा मृत्युदण्ड दिइएका चार दोषीमध्ये एक मुकेश सिंहले केही दिनअघि दया निवेदन दिएका थिए । 

दिल्ली सरकारले दया निवेदन अस्वीकार गर्ने सिफारिश गर्दै गृह मन्त्रालयलाई पत्र पठाएपछि गृहले राष्ट्रपतिलाई सिफारिश सहित दया निवेदन पठाएको थियो ।


Advertisement

मुकेश सिंह, विनय शर्मा, अक्षय कुमार सिंह र पवन गुप्तालाई तिहाड जेलमा माघ ८ गते बिहान सात बजे झुण्ड्याइनेछ । तर मुकेशले दया निवेदन दिएपछि त्यस मितिमा फाँसी नदिइने दिल्ली सरकारले उच्च अदालतलाई खबर गरेको थियो ।

तर राष्ट्रपतिले दया निवेदन अस्वीकार गरेको अवस्थामा उनीहरूलाई त्यही मितिमा झुण्ड्याइने सम्भावना छ ।

यसैबीच निर्भयाकी आमा आशा देवीले प्रधानमन्त्री नरेन्द्र मोदीलाई शुक्रवार अपील गर्दै सन् २०१४ मा तपाईं महिला सुरक्षाको प्रतिज्ञा गरेर शक्तिमा आउनुभएको थियो त्यसैले दोषीहरूलाई माघ ८ मै झुण्ड्याउनुस् भनेकी छन् । 

एएनआई समाचार संस्थासँगको अन्तर्वार्तामा आशा देवीले चार दोषीलाई फाँसी दिन विलम्बको दोषारोपण भाजपा र आपले गरेको भन्दै दुवैलाई आलोचना गरेकी छन् ।

एजेन्सी
 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्