यही माघ ९ गते सम्पन्न राष्ट्रिय सभा निर्वाचनको अन्तिम परिणाम सहितको प्रतिवेदन निर्वाचन आयोगले राष्ट्रपति विद्यादेवी भण्डारीसमक्ष पेश गरेको छ ।

प्रमुख निर्वाचन आयुक्त दिनेशकुमार थपलियाले बुधवार शीतल निवास पुगेर राष्ट्रिय सभा सदस्य निर्वाचन ऐन, २०७५ को दफा ६० बमोजिमको प्रतिवेदन राष्ट्रपति भण्डारीसमक्ष पेश गरेको निर्वाचन आयोगका प्रवक्ता सहसचिव राजकुमार श्रेष्ठले विज्ञप्तिमार्फत जनाएका छन् ।

निर्वाचन आयोगको परामर्शमा नेपाल सरकारको मिति २०७६ साल मंसिर २३ गतेको निर्णय अनुसार मिति २०७६ साल माघ ९ गते राष्ट्रिय सभा सदस्यको निर्वाचन सम्पन्न भएको थियो । 

उक्त निर्वाचनमा मिति २०७६ साल फागुन २० गतेबाट रिक्त हुन गइरहेको १९ जना राष्ट्रिय सभा सदस्यहरू मध्ये १८ जना राष्ट्रिय सभा सदस्यको निर्वाचन सम्पन्न भएकोमा यस निर्वाचनमा सात प्रदेशबाट महिला समूहतर्पm सातजना, दलित समूहतर्फ दुईजना, अपाङ्गता भएका व्यक्ति वा अल्पसंख्यक समूहतर्पm दुईजना र अन्य समूहतर्पm सातजना निर्वाचित भएका छन् । 

आयोगद्वारा राष्ट्रपतिसमक्ष पेश गरिएको निर्वाचन परिणाम प्रतिवेदनमा मूलतः राष्ट्रिय सभा गठन सम्बन्धी संवैधानिक एवं कानूनी व्यवस्था, निर्वाचनको सन्दर्भमा राजनीतिक दल दर्ता, मतदाता नामावली, मतपत्र व्यवस्थापन, निर्वाचन सुरक्षा, निर्वाचन कार्यक्रम, जनशक्ति र सामग्री व्यवस्थापन, निर्वाचन आचार संहिता, निर्वाचन अनुगमन र अवलोकन तथा मतदान, मतगणना र परिणाम घोषणाका विषयलाई उल्लेख गरिएको छ । 

उक्त अवसरमा राष्ट्रिय सभा सदस्य निर्वाचन, २०७६ को परिणाम प्रतिवेदन ग्रहण गर्दै निर्वाचन आयोगले संवैधानिक र कानूनी व्यवस्था बमोजिम राष्ट्रिय सभा सदस्यको निर्वाचन स्वच्छ, स्वतन्त्र, निष्पक्ष एवं विश्वसनीय रूपमा सम्पन्न गरेकोमा निर्वाचन आयोगका पदाधिकारी एवं राष्ट्रसेवक कर्मचारी लगायत निर्वाचन सम्पन्न गर्न संलग्न सबै निकाय, संस्था एवं व्यक्तिहरूलाई राष्ट्रपति भण्डारीले धन्यवाद दिइन् ।

प्रत्येक दुई वर्षमा हुने राष्ट्रिय सभा सदस्यको निर्वाचनले निर्वाचन सञ्चालनका सम्बन्धमा परिपक्वता ल्याउने र नियमितरूपले सिक्ने अवसर प्राप्त भएको समेत उनले बताइन् ।

भविष्यमा सम्पन्न हुने निर्वाचनहरूलाई अझै सहभागितामूलक, शान्तिपूर्ण र व्यवस्थित तवरले सम्पन्न गर्न निर्वाचन सुधारका क्षेत्रमा थप कार्य गर्न पनि राष्ट्रपति भण्डारीले निर्देशन दिइन् ।

सो अवसरमा आयोगका प्रमुख आयुक्त दिनेश कुमार थपलियाले राष्ट्रिय सभा सदस्य निर्वाचन, २०७६ सम्पूर्ण सरोकारवालाहरूको सौहार्दपूर्ण एवं उत्साहपूर्ण सहभागितामा शान्तिपूर्ण तबरले सम्पन्न भएको जानकारी गरए ।