नेपालले आगामी महिना अमेरिका र क्यारेवियन मुलुकमा हुने टी–२० पुरुष विश्वकप क्रिकेट खेल्न १५ सदस्यीय टोली घोषणा गरेको छ ।

यस अघि खेल्दै आएका अनुभवीसहितका फास्ट बलर कमलसिंह ऐरी र स्पिनर सागर ढकाललाई पनि समेट्दै नेपालले बुधवार १५ सदस्यीय टिम घोषणा गरेको हो । 

नेपालले घोषणा गरेको टिमलाई आईसीसीले बलियो टिम भनेको छ ।

नेपाल क्रिकेट संघ (क्यान)ले घोषणा गरेलगत्तै आइसीसीको वेबसाइटमा नेपाली टोली बलियो रहेको समाचार आएको छ । नेपालले ठूलो सरप्राइज नदिए पनि अनुभवी र युवा खेलाडीलाई अवसर दिएको उल्लेख गरेको छ । वेस्ट इण्डिज 'ए'सँग अभ्यास खेल खेलिरहेका खेलाडीलाई टिममा समावेश गरेको आईसीसीले उल्लेख गरेको छ । 

आईसीसीले वेस्ट इण्डिज 'ए'विरुद्ध शतक हानेका, एसीसी प्रिमियर कपमा ६ छक्का प्रहार गरेका दीपेन्द्र सिंह ऐरी, कुशल भुर्तेल, आशिफ शेखसहितको टोलीलाई बलियो मानेको छ । 

यू १९ विश्वकप खेलेका गुल्सन झा र प्रतिश जिसीसहितका युवा टोलीले टिममा स्थान बनाएको आईसीसीले जनाएको छ । 

२०१४ मा विश्वकप खेल्दाका सोमपाल कामी पनि विश्वकपमा स्थान बनाएका छन् । 

नेपाल रहेको विश्वकपको समूह 'डी'मा नेदरल्यान्ड्स, दक्षिण अफ्रिका, श्रीलंका र बंगलादेश छन् । 

नेपालले पहिलो खेल ४ जुनमा नेदरल्याण्ड्स, ११ जुनमा श्रीलंका, १४ जुनमा दक्षिण अफ्रिका र १६ जुनमा बंगलादेशसँग खेल्नेछ । 

विश्वकप आगामी १ देखि २९ जुनसम्म चल्नेछ ।

२०१४ को विश्वकपमा नेपाल समूह चरणमा अफगानिस्तान र हङकङलाई पराजित गरे पनि रनरेटमा पछि परेपछि नकआउट चरणमा पुग्नबाट बन्चित भएको थियो ।

नेपाली टोलीमा कप्तान रोहित पौडेल, आशिफ शेख, अनिलकुमार साह, कुशल भुर्तेल, कुशल मल्ल, दीपेन्द्रसिंह ऐरी, ललित राजवंशी, करण केसी, गुल्सन झा, सोमपाल कामी, प्रतिश जिसी, सन्दीप जोरा, अविनाश बोहोरा, सागर ढकाल र कमलसिंह ऐरी छन् ।