हेटौंडा, २५ मसिर  - संक्रमणकालनी राजनीतिका चतुर खेलाडी राप्रपा नेपालका अध्यक्ष तथा उपप्रधानमन्त्री कमल थापाले पराजयमा ‘ह्याट्रिक' गरेका छन् । 
उनी प्रतिनिधिसभामा मकवानपुर १ बाट चिरपरिचित प्रतिस्पर्धी एमालेका कृष्ण दाहालसँग ५ हजार ९ सय ७३ मत अन्तरले पराजित भए । दाहालले ४० हजार ६ सय ३१ मत ल्याएर जितको ‘ह्याट्रिक' गरे । थापाले ३४ हजार ६ सय ५८ मत प्राप्त गरे ।

२०४८ र २०५६ को निर्वाचनमा दाहालले थापालाई हराएका थिए भने २०५१ को निर्वाचनमा थापाले दाहाललाई हराएका थिए । दाहाललाई बधाई दिँदै थापाले आफूलाई मत दिने मतदाताप्रति आभार व्यक्त गरेका छन् । जिल्लामा प्रतिनिधिसभाको एउटा र प्रदेशसभाका चारवटै सिट छाडेर प्रतिनिधिसभा सदस्यका लागि मकवानपुर १ बाट प्रतिस्पर्धामा उत्रिएका थापाको चुनावी कसरत अन्ततः वाम गठबन्धनसँग हार स्वीकार्न बाध्य भयो, अन्नपूर्ण पोस्टमा खबर छ  ।