भर्खरै सम्पन्न निर्वाचनबाट वामपन्थी गठबन्धनले जनताको अभूतपूर्व समर्थन पाएको छ । वामपन्थी गठबन्धनप्रति देखिएको जनलहरबाट मूलतः नेपालका कम्युनिस्टहरू एक ठाउमा जम्मा हुनुपर्छ भन्ने मत देखियो र अहिले उनीहरू एक ठाउँमा भएको सन्देश दिनेबित्तिकै यसको पक्षमा उत्साहजनक समर्थन आयो । 

दोस्रो कुरा, लामो समयसम्मको राजनीतिक अस्थिरता र त्यसले पैदा गरेको अव्यवस्था नेपालको ठूलो समस्याको रूपमा रहेको थियो । राजनीतिक अस्थिरताविरुद्ध स्थिर सरकार र सुशासनको पक्षमा हामी वामहरूले नारा दिएका थियौं र यी दुईवटा नारा या कारणले वामपन्थीको पक्षमा जनलहर आएको मेरो बुझाइ छ । 

प्रमुख दुई वामपन्थी दलको एजेन्डा स्थापित भयो र त्यसलाई जनताले अनुमोदन गरिदिए । जनताले खोजेको र चाहेको एजेन्डा नै प–यो, त्यसो हुनाले जनताबाट अनुमोदित भयो । अर्कोतर्फ, लामो समय सत्ताको नेतृत्वमा रहेको कांग्रेसप्रतिको वितृष्णा पनि वामपन्थी गठबन्धनको पक्षमा जनलहर आउनुको कारण हो । 

जनताबाट पाएको अपार समर्थनलाई अब हामीले सदुपयोग गर्नुपर्नेछ । त्यसका लागि पहिलो कुरा नेताहरूले जनता र राष्ट्रको पक्षमा सोच्छन् भन्ने एउटा सकारात्मक सन्देश दिन जरूरी छ । पदको भागबण्डा, लोभ ,कचिंगल, गुटबन्दी, अस्वस्थ प्रतिस्पर्धा दुई पार्टीका बीचमा सरकार गठनकै बेलामा चटक्क छोडेर निकै राम्रो सन्देश दिन जरूरी छ । नेताहरूले क्षणिक स्वार्थभन्दा पनि विशुद्ध जनताको पक्षमा काम गरेर सन्देश दिन जरूरी छ । 

जनतालाई निराश नबनाउन ठूला ठूला जम्बो मन्त्रिमण्डल बनाउने भन्दा पनि योग्य मानिसको सानो टीम बनाएर काम गर्नुपर्छ । दोस्रो कुरा चाहिँ, पार्टी र नेताहरूले गरेका प्रतिबद्धता कार्यान्वयन हुन्छन् कि हुँदैनन् भन्ने विश्वास दिलाउन सक्नुपर्छ । चुनावमा बोलेका कुरा पूरा नहुन सक्छन् भन्ने गलत परम्पराको पुनरावृत्ति हुन दिनुहुँदैन । घोषणापत्र कार्यान्वयन हुँदैन, केवल लेखिएका कुरा हुन् भनेर एकप्रकारको वितृष्णा छ जनता र बुद्धिजीवीमा । यसलाई हामीले हटाउन जरूरी छ ।  

घोषणापत्रप्रति पार्टीहरू र नेताहरू उत्तरदायी हुन्छन् भन्ने कुराको सन्देश दिन सकियो भने र घोषणापत्रमा उल्लेख गरिएका एक वर्षे, दुई वर्षे, पाँच वर्षे योजना कार्यान्वयन गर्दै जान सक्यौं भने जनताको विश्वास जित्न सकिन्छ । त्यसले वामपन्थी गठबन्धन मात्र होइन, अन्य राजनीतिक दलहरूलाई पनि विश्वासको वातावरण बनाउन मद्दत गर्छ, दलहरूले घोषणा गरेको कुरा पूरा हुन्छ भनेर । यो प्रमुख कुरा हो, त्यसरी नै लागू गर्न जरूरी छ । 

२०६४ सालमा पनि माओवादीले जनलहर ल्याएको थियो, तर जनताले सोचेको उपलब्धि हासिल हुन सकेन । सबभन्दा ठूलो कुरा राजनीतिमा इमान्दारिता देखाउन सक्नु प–यो, सरकार गठनदेखि नै सकारात्मक सन्देश दिनुप–यो, नेताहरू पदीय भागबण्डाको लोभमा छैनन् भन्ने खालको सन्देश दिनुप–यो । दोस्रो कुरा चाहिँ घोषणापत्रमा उल्लेख गरिएका कुरालाई सही ढंगले कार्यान्वयन गर्नुप–यो र छिटोभन्दा छिटो पार्टी एकीकरणको प्रक्रियालाई अगाडि बढाउने, दुईवटा पार्टीलाइ एक.गरेर अरू कम्युनिस्टलाई पनि एउटै धु्रवमा ल्याउने प्रक्रिया अघि बढायौं भने सकारात्मक सन्देश दिन सक्छौं । 

जनतामाझ गरिएका वाचा पूरा गर्न सक्यौं भनेमात्र एउटा निर्वाचनपछि अर्को निर्वाचनमा जाँदा परिणाम उल्टिने विगतको इतिहासलाई हामीले रोक्न सक्छौं । यसपटक विगतका गल्ती दोहोरिँदैनन्, जनता निराश हुनुपर्दैन । जनताले वामपन्थी गठबन्धनलाई दिएको अन्तिम मौका हो यो भन्ने मैले बुझेको छु । 

(माओवादी युवा नेता बराल प्रदेशसभाका नवनिर्वाचित सांसद हुन् ।) 
कुराकानीमा आधारित