काठमाडौं, २८ मंसिर– बिहीबार प्रकाशित सबैजसो पत्रिकाले प्रतिनिधिसभा र प्रदेशसभाको निर्वाचनको प्रत्यक्षतर्फको सबै नतिजा सार्वजनिक भएको विषयलाई प्राथमिकता दिएका छन् । यसैगरि, समानुपातिकतर्फ नेकपा एमालेको अग्रताकायमै रहेको विषय पनि प्राथमिकतामा परेको छ । 
निर्वाचनको मतपरिणाम सार्वजनिक हुनेक्रम अन्त्यतिर पुग्दै गर्दा सरकार गठन र प्रदेशका मुख्यमन्त्रीको पनि चर्चा हुन थालेको छ । प्रदेश नम्बर १, ३, ४ र ५ मा नेकपा एमालेको दावी ६ र ७ मा माओवादीको दावी रहेको समाचारलाई कान्तिपुर दैनिकले प्रथम पृष्ठमा छापेको छ । ६०–४० को सूत्रबाटै मुख्यमन्त्री र सभामुख बाँडिने बताइएको छ । 

निर्वाचनमा विजयी भएपछि उम्मेदवाहरुले मतदातासँग गरिरहेको भेटघाट घरदैलोले पनि पत्रिकामा स्थान पाएको छ । अर्कोतर्फ कुन स्थानबाट कस्ता उम्मेदवार विजयी भए, संसद बैठकको तयारी, अब बन्ने सरकारमा मन्त्रीहरुको संख्या पनि आजका पत्रिकाका मुख्य समाचार बनेका छन् । 
देशमा अब १३५ मन्त्री हुने र  नयाँ सरकारका मन्त्रालय कस्ता हुन्छन् भन्ने विषयलाई नयाँ पत्रिकाले मुख्य पृष्ठमा छापेको छ । संविधानको व्यवस्थाअनुसार केन्द्रमा २५ र सात प्रदेशमा बढीमा एक सय दश मन्त्री बन्नेछन् । 
संसद ग्यालरीमा ६८ सांसद नयाँ रहने र २३ जना महिला उम्मेदवार निर्वाचित भएको खबर गोरखापत्रले मुख्य पृष्ठमा छापेको छ । प्रतिनिधिसभाको १६५ प्रत्यक्षतर्फको सिटमा ६८ नयाँ सांसद विजयी भएका छन् । प्रतिनिधिसभामा समानुपातिकसहित झण्डै आधा सांसद नयाँ हुने देखिएको छ । प्रतिनिधिसभा सदस्यमा वाम गठबन्धनबाट उम्मेदवार बनेका ६ जना र प्रदेशसभा सदस्यतर्फ १७ महिला विजयी भएका छन् । 

सरकार गठनको चर्चा चलिरहदा अन्नपूर्ण पोस्टले प्रधानमन्त्री पहिले कि संसद् बैठक पहिले भन्ने विषयलाई प्राथमिकतामा राखेको छ । प्रत्यक्षतर्फको निर्वाचनमा कांग्रेसले अनपेक्षित पराजय भोगेपछि अपजस झेली रहेका प्रधानमन्त्री एवं कांग्रेस सभापति शेरबहादुर देउवाले नतिजा अपेक्षित र स्वभाविक भएको प्रतिकृया दिएका छन् । यता कांग्रेसका केही नेताहरुले बिशेष महाधिवेशनको माग पनि गर्न थालेका छन् । उनीहरुले नेतृत्वको कारण नै कांग्रेसले अनपेक्षित पराजय भोग्नु परेको आरोप लगाएका छन् ।

निर्वाचनमा मतदाता शिक्षाको अभाव रहेको पनि पाइएको छ । केही जिल्लामा उम्मेदवारको मत भन्दा बदर मत बढी रहेको छ । प्रमुख निर्वाचन आयुक्त अयोधिप्रसाद यादवले पनि यो विषयलाई स्विकारेका छन् ।