सुशासन

श्रमको फारम भरिदिने नाममा अवैध रकम असुल्ने ३० जना दलाल ताहाचलबाट पक्राउ

ईश्वर अर्याल

चैत २८, २०७४

काठमाडौं, २८ चैत-श्रमको फारम भराउने नाममा अवैध रकम असुलिरहेका ३० जना वैदेशिक रोजगार विभागको ताहाचलस्थित श्रम कार्यालय अगाडिबाट पक्राउ परेका छन् ।

सेवाग्राही बनेर सादा पोशाकमा गएका प्रहरीहरुले ठगी गरिरहेको अवस्थामा बुधबार ३० जनालाई रंगेहात पक्राउ गरेको प्रहरीको अपराध अनुसन्धान महाशाखा टेकुका डीएसपी मनकुमार थापाले लोकान्तरलाई जानकारी दिए ।

श्रमको फारम अनलाइन भर्ने र वैदेशिक रोजगारमा जानेहरूको बीमा गरिदिने नामामा उनीहरूले रु ५०० देखि रु २५०० सम्म असुल्ने गर्ने गरेको स्थलगत रिपोर्टिङसहितको समाचार लोकान्तर डटकमले फागुन २१ गते प्रकाशित गरेको थियो । त्यसलगत्तै ३५ जना पक्राउ परेका थिए ।

दैनिक एक दुईजना समातिने गरेको भए पनि सामूहिक रूपमा यति धेरैजना समातिएको यो दोस्रो पटक हो ।

यसरी समातिएकाहरूलाई जिल्ला प्रशासन कार्यालयले सार्वजनिक अपराधको मुद्दा लगाउने गरेको छ । यसअघि समातिएकाहरू तारेख धाइरहेका छन् ।

यो पनि पढ्नुहोस्