युएई- वैदेशिक रोजगारीका क्रममा संयुक्त अरब इमिरेट्स युएई पुगेका १८५ नेपालीले जेल जीवन विताइरहेको तथ्य सार्वजनिक भएको छ ।

युएईस्थित नेपाली दूतावासले युएईका सातावटै प्रदेशका जेलमा रहेका नेपालीहरुको तथ्यांक सार्वजनिक गरेको हो ।   दूतावास श्रोतका अनुसार विभिन्न मुद्दामा १७३ जना पुरुष र १२ जना महिला गरि १८५ जना नेपालीले युएईका विभिन्न जेलमा  जेल जीवन बिताइरहेका छन् ।

जेल पर्नेमध्ये मद्यपान र वेश्यावृत्तिमा संलग्नको संख्या धेरै छ । उनीहरु ९५ जना रहेको दूतावासले जारी गरेको प्रतिवेदनमा उल्लेख छ । अवैधानिक काम र बसाईका कारण १८ जना जेल परेका छन् भने झगडा, भौतिक आक्रमण या कसैको व्यक्तिगत या संस्थागत सम्पति नष्ट गरिदिएको आरोपमा १८ जना युएईको जेलमा रहेका छन् ।   

चोरी र व्यभिचारी मुद्दामा २५ जना र हत्याको आरोपमा ९ जना जेलमा रहेका छन् । लागू औषध सेवन, किर्ते र अन्य ठगीको आरोपमा २० जना जेल परेको दूतावासले सार्वजनिक गरेको छ ।

दूतावासले परराष्ट्र मन्त्रालय मार्फत सरकारलाई पठाउन तयार पारेको प्रतिवेदनमा ३६ जना नेपालीले हालै आममाफी पाएर नेपाल फर्कन लागेको उल्लेख छ । उनीहरुमध्ये कतिपयलाई विभिन्न अवसरमा युएई सरकारले आममाफी दिएको थियो ।

जेलमा रहेका १२ जना महिला भने भिजिट भिसामा युएई आएर वेश्यावृत्ति र अन्य अवैध काममा संलग्न भएका कारण पक्राउ परेको जनाइएको छ ।