काठमाडौं, ८ जेठ– ३३ किलो सुन तस्करीको मुख्य योजनाकार मानिएका गोरे उर्फ चूडामणि उप्रेती पक्राउ परेका छन् । प्रहरीले गोरेलाई भारतबाट पक्राउ गरी नेपाल ल्याएको हो ।

मोरङ उर्लाबारीका स्थायी बासिन्दा गोरे सामान्य परिवारका सदस्य हुन् । उनका बुवा नेपाल प्रहरीको जागिरे थिए । रोजगारीको शिलशिलामा दुबईमा रहँदा गोरेको सम्पर्क सुन तस्करहरूसँग भएको थियो । उनले त्यहीँबाट सुन तस्करी शुरु गरे ।

नेपालमा संगठित ढंगले सुन तस्करी गर्ने समूहका नाइके भएकोले उनलाई ‘सुन डन’को रूपमा चित्रित गर्ने गरिएको छ ।

सुन तस्करी प्रकरण र सनम शाक्यको हत्यापछि गोरे भारतमा लुक्दै आएका थिए । गोरेले त्रिभुवन अन्तर्राट्रिय विमानस्थलबाट क्विन्टलका क्विन्टल सुन तस्करी गरेको छानविन समितिको अनुसन्धानले देखाएको छ ।

गृह मन्त्रालयका सहसचिव ईश्वरराज पौडेल नेतृत्वको समितिले सुन तस्करीको सम्बन्धमा छानबिन शुरु गरेपछि प्रहरीका उच्च अधिकारीहरू समेत पक्राउ परेका छन् ।

गोरेले सुन तस्करीका लागि विमानस्थलमा खटिएका सुरक्षा अधिकारीसँग सम्बन्ध बनाएका थिए । उनीहरूकै सहयोगमा करीब ३८ सय किलो सुन तस्करी भएको छानबिन समितिको निष्कर्ष छ ।

यो पनि पढ्नुहोस् :

साढे ३३ किलो सुन : गोरेले नै बजारमा बेचिसके !