परराष्ट्रका प्रारम्भिक पहल

जेठ २१, २०७५

परराष्ट्रमन्त्री प्रदीपकुमार ज्ञवालीले आइतवार सञ्चारकर्मीहरूको एक समूहसितको संवादका क्रममा दिएका अभिव्यक्तिले सरकार नेपालका द्विपक्षीय, क्षेत्रीय र बहुपक्षीय सम्बन्धका प्राथमिकतामा गुणात्मक परिवर्तन ल्याउन व्यग्र देखिन्छ । सिमाना जोडिएका छिमेकी देश भारत र चीनसितको सम्बन्धलाई यथोचित महत्वका साथ अघि बढाउने अठोट व्यक्त गर्दा चालू व्यापार घाटा कम गर्ने समेतका पहलबारे उल्लेख भएको छ ।

अब उप्रान्त द्विदेशीय वार्ताका कार्यसूचीमा नेपालका आन्तरिक मामिला पर्न नदिने नीतिगत दृढता जनाइएको छ । प्रधानमन्त्री खड्गप्रसाद शर्मा ओलीको सम्पन्न  भारतभ्रमण र आसन्न चीनभ्रमणको परिप्रेक्ष्यमा मन्त्री ज्ञवालीको यस भनाइलाई आकलन गर्नुपर्ने हुन्छ । राष्ट्रको स्वाभिमान र हितलाई सर्वोपरि राख्ने प्रतिबध्दतालाई जनस्तरबाट मूल्याङ्कन भैरहेको पनि छ ।


ADVERTISEMENT

दक्षिण एसियाको क्षेत्रीय परिवेशमा मन्त्री ज्ञवालीका कथनले नेपाल सार्क प्रकृयालाई अवरुध्द हुन नदिन कृतसंकल्प रहेको जानकारी दिएको छ । हामी सार्कको विकल्प खोज्ने पक्षमा छैनौं भन्ने उहाँको दृढोक्तिले एकातिर यहाँको जनमत थप आश्वस्त हुने वातावरण निर्माण हुन्छ भने र अर्कोतिर छिमेकका भारत र पाकिस्तान दुबै मुलुकमा नेपालको यस मान्यतायुक्त सन्देश प्रवाहित हुन पाउँछ । परराष्ट्रमन्त्रीले भने झैं, जब उत्तर कोरिया र अमेरिका समेत वार्ताबाट समस्या हल गर्ने दिशामा अग्रसर  हुन सक्छन् भने भारत र पाकिस्तान बीच रहिआएका असमझदारी हट्ने स्थितिको सिर्जना हुने कुरामा किन आशावादी नहुने ?

यस्तै, नेपाल अर्को क्षेत्रीय मञ्च, बिमस्टेक,को शिखर सम्मेलनको तयारीमा रहेको छ। यसलाई नेपालको प्रयत्न सही दिशामा उन्मुख भएको सङ्केत मान्नुपर्छ । त्यस्तै, दक्षिण एसियाबाहिर नेपालका सम्बन्धहरू विस्तार गर्ने उद्देश्य पनि समयसापेक्ष हो।

संयुक्त राष्ट्रसंघको संरचनागत सुधार, विशेष गरेर सुरक्षा परिषद्को सदस्य-संख्या विस्तार र साना भौगोलिक आकारका मुलुकहरूको समुचित प्रतिनिधित्व गराउने दिशामा प्रयत्न चालू राख्ने गर्ने सोच प्रशंसनीय हो यद्यपि यस दिशाका कदमहरूले तत्काल नतीजा ल्याउने सम्भावना देखिँदैन; हुँदैन । किनभने राष्ट्रसंघमा परम्परागत ढङ्गले हालिमुहाली राख्ने देशहरू एकाएक त्यस विश्वसंस्थामा जरो गाडेका आफ्ना विशेष अधिकारहरू त्याग्न वा घटाउन इच्छुक हुँदैनन् ।

 तर त्यसो भन्दैमा प्रयास, प्रयत्न नगर्ने कुरा आउँदैन । बरू असंलग्न आन्दोलन समेतका मञ्चहरूको प्रभावकारी उपयोग गर्दै परिवर्तनको पक्षमा सशक्त आवाज उठाउन नेपाल सकृय रहने अपेक्षा गरौं । 

जेठ २१, २०७५ मा प्रकाशित

प्रतिक्रिया दिनुहोस

ताजा समाचार