काठमाडौं, ११ असार – फूटबल विश्वकपमा आइतवारसम्म ३२ वटा खेल भइसकेका छन् । सात टोलीले प्रिक्वार्टरफाइनल अर्थात् राउन्ड अफ १६ मा स्थान पक्का गरिसकेका छन् भने आठवटा टोली प्रतियोगितामा माथि नजाने निश्चित भइसकेको छ । 

अब चार दिनमा १७ मध्ये नौ टोली प्रिक्वार्टरफाइनलमा पुग्नेछन् । 

आज सोमवारदेखि बिहीवारसम्म प्रत्येक दिन चारवटा खेल हुनेछन् । एउटै समयमा दुई खेल खेलिनेछन् । कुनै टीमको हार वा जीतले ऊ रहेको समूहको अन्य टीमलाई अन्तिम १६ मा पुग्न नदिने हुनसक्ने भएकाले यस्तो व्यवस्था गरिएको हो । 

पहिलापहिला आफ्नो समूहको अन्य टीमको खेलको परिणाम थाहा पाएपछि गडबडी हुनेगरेका थिए । त्यसैले एकैचोटि खेलाउने व्यवस्था गरिएको हो । 

सोमवार उरुग्वे र रुस अनि साउदी अरब र इजिप्ट पौने ८ बजेबाट शुरू हुने खेलमा भिड्दैछन् भने स्पेन र मोरक्को अनि इरान र पोर्चुगल चाहिँ पौने १२ बजेदेखि शुरू हुने खेलमा आमनेसामने हुनेछन् ।

उरुग्वे विरुद्ध रुस
उरुग्वेले लगातार तेस्रो विश्वकपमा अन्तिम १६ मा स्थान बनाएको छ भने रुस ३२ वर्षपछि प्रिक्वार्टरफाइनलमा पुगेको हो । सोभियत संघ हुँदा सन् १९८६ मा रुस प्रिक्वार्टरफाइनलमा पुगेको थियो । 

दुवै टोली जम्मा एकचोटि भिडेका छन् र त्यो खेल बराबरीमा टुंगिएको थियो । विश्वकपमा उनीहरू पहिलोपटक भिड्दैछन् । रुस पहिला सोभियत संघ हुँदा भने उरुग्वेसँग सातचोटि भिडेको थियो । उरुग्वेले विश्वकपको समूह चरणमा कहिले पनि सबै म्याच जितेको इतिहास छैन । 

साउदी अरब विरुद्ध इजिप्ट
यी दुवै टोली प्रतियोगिताबाट बाहिरिसकेका छन् । साउदीविरुद्ध इजिप्टको इतिहास राम्रो छ । दुवैले अहिलेसम्म ६ खेल खेलेका छन् जसमा इजिप्टले चारवटामा जितेको छ भने एउटा खेल बराबरी भएको छ । साउदीले इजिप्टविरुद्ध एक खेल जितेको छ । 

विश्वकपमा साउदी अरबले पछिल्ला १२ खेलमा एउटामा पनि जीत हासिल गरेको छैन । सन् १९९४ मा साउदीले मोरक्कोविरुद्ध जितेपछि ऊ हारेको हा–यै छ ।

स्पेन विरुद्ध मोरक्को
स्पेन र मोरक्को अहिलेसम्म दुईचोटि भिडेका छन् । दुवैमा स्पेनले जीत हासिल गरेको छ । त्यसो त मोरक्को विश्वकपबाट बाहिरिसकेको छ तर उसको हारजीतले स्पेनलाई असर पार्छ । स्पेनले उसलाई हराएमा अन्तिम १६ मा स्थान पक्का हुन्छ । 

इरानविरुद्ध पोर्चुगल
पोर्चुगल र इरान अहिलेसम्म दुईचोटि मात्र भिडेका छन् । दुवैमा इरान हारेको छ । त्यति मात्र नभई इरानले पोर्चुगलविरुद्ध कुनै गोल समेत गर्न सकेको छैन भने पोर्चुगलले उसविरुछ पाँच गोल गरेको छ । 

पोर्चुगलका कप्तान क्रिस्टियानो रोनाल्डोले यस विश्वकपका दुई खेलमा चार गोल गरिसकेका छन् । इरानले कथंकदाचित् पोर्चुगललाई हराएमा अनि स्पेनले मोरक्कोलाई हराएमा पोर्चुगल समूह चरणबाट माथि उक्लिन सक्नेछैन ।

एजेन्सी