बुटवलको सुप्रिम सहकारीको रकम हिनामिना गरेको आरोपमा पक्राउ परेको पूर्वउपराष्ट्रपति नन्दबहादुर पुनका छोरा दीपेश शुक्रवार थुनामुक्त भएका छन् ।

सहकारी ठगीमा जिल्ला अदालत रुपन्देहीले यही वैशाख ७ मा उनलाई ४ लाख धरौटी बुझेर छाड्न आदेश दिएको थियो । तर उनले धरौटी नबुझाएपछि कारागार चलान गरिएको थियो ।

६ दिनपछि पुनले धरौटी बुझाएका रुपन्देही प्रहरी प्रमुख (एसपी) रञ्जित राठौरले बताए ।

शुक्रवार धरौटी रकम बुझाएर कारागारबाट तारिखमा छुटेका पुनलाई सीआईबीको टोलीले फेरि नियन्त्रणमा लिने तयारी गरेको छ ।

सहकारी ठगी प्रकरणमा अदालतले धरौटीमा रिहा गर्ने आदेश दिए पनि सुन तस्करी प्रकरणमा समेत नाम जोडिएकाले पुनः पक्राउ पर्ने डरले उनले धरौटी नबुझाएका बताइएको छ ।

तर शुक्रवार सहकारी ठगी प्रकरणमा अदालतले तोकेको चार लाख रुपैयाँ उनले बझाएका छन् ।

अदालतले सहकारीका अध्यक्ष ओम गुरुङलाई पुर्पक्षका लागि थुनामा र दीपेशसहित ६ जनालाई धरौटीमा छाड्न आदेश दिएको थियो ।

दीपेशसँग ४ लाख, नवीन अछामीसँग १० लाख, लिला चापागाईंसँग १८ लाख, दीपक न्यौपानेसँग ४ लाख ४५ हजार, नीता थापा मगरसँग २ लाख र रोशनी गुरुङसँग २ लाख धरौटीको माग गरिएको थियो ।