पत्रकार तथा साहित्यकार केशव दुवाडीको बाल कथा संग्रह जुँगे झाँक्रीको भूत सार्वजनिक भएको छ । धादिङ वेसीमा भएको एक कार्यक्रममा दुवाडीको कथा संग्रहको विमोचन भएको हो ।

जिल्ला समन्वय समिति धादिङका प्रमुख जगन्नाथ नेपाल र प्रमुख जिल्ला अधिकारी भागिरथ पाण्डेले उक्त कथा संग्रहको संयुक्त रुपमा विमोचन गर्नुभएको थियो ।

९ वटा कथा समावेश भएको बालकथा संग्रह ‘जुँगे झाँक्रीको भूत’का विषयमा धादिङका अग्रज साहित्यकार बद्रीप्रसाद दाहालले टिप्पणी गर्नुभयो । कथा संग्रहमा समावेश भएका कथाबाट सामाजिक सन्देशका साथसाथै भरपुर मनोरञ्जन पनि पाउन सकिने सो अवसरमा दाहालले टिप्पणि गर्नुभयो । उहाले साहित्यको क्षेत्रमा अग्रसर दुवाडीका कथाहरु रोचक तथा मनन योग्य रहेको बताउँदै सबै उमेर समुहका लागि पठनीय सामाग्रीले भरिपूर्ण रहेको पनि उल्लेख गर्नुभयो ।

छोटो समयमा प्रकाशित कृतिका बारेमा टिप्पणि गर्नु ज्यादै जटिल काम भएको बताउँदै साहित्यकार दाहालले कथा सरल, र छोटो मिठो रहेको पनि बताउनुभयो । मुलतः यो पुस्तक बालबालिकाहरुका लागि अति उपयोगी हुने समेत उहाले टिप्पणी गर्नुभयो ।

यसैविच पुस्तकका बारेमा बोल्दै कथाकार केशव दुवाडीले बालअधिकार र संरक्षणको क्षेत्रमा काम गर्ने क्रममा बाल साहित्यप्रतिपनि रुची बढ्दै गएको र सोहीक्रममा लेखिएका कथाहरु त्यति वेला विभिन्न पत्रपत्रिकामा पनि प्रकाशित भएका र सोही फुटकर कथाहरुको एकिकृत रुपबाट पुस्तक तयार भएको बताउनुभयो ।

४० पृष्ठको कथासंग्रहमा ९ वटा कथा समावेश गरिएको छ । आवाज अभियान नेपाल नीलकण्ठ नगरपालिका धादिङले प्रकाशन गरेको कथा संग्रहको भूमिका नेपाल बाल साहित्य समाजका उपाध्यक्ष डा.शैलेन्दुप्रकाश नेपालले लेख्नुभएको छ । नेत्रावती छापाखाना गल्छी धादिङले प्रकाशन गरेको पुस्तकको मुल्य १०० रुपैँया छ । यसै विच कथामा देवेन्द्र थुम्केलीले चित्राङ्कन गरी कथालाई अझै जिवन्तपार्नुभएको छ ।