काठमाडौं– प्रधानन्यायाधीशका लागि सिफारिस कायमुकायम प्रधानन्यायाधीश दीपकराज जोशी आइतवार दिनभर सर्वोच्च अदालतमा अनुपस्थित रहे । 

बालुवाटारस्थित सरकारी क्वार्टरबाटै आइतवारको दैनिक पेशी तोकेका जोशी अदालत भने गएनन् । 

प्रधानन्यायाधीशका लागि सिफारिस जोशी संसदीय सुनुवाइ विशेष समितिमा बिचाराधीन अवस्थामा रहेको सुनुवाइको निर्णय अन्यौलमा रहेपछि आइतवार दिनभर क्वार्टरमै बसेका थिए । 

संसदीय विशेष सुनुवाइ समितिले बिहीवार जोशीसँग सवाल–जवाफ गरेको थियो । 

जोशीमाथि समितिमा ५ वटा उजुरी परेकोमा सवाल–जवाफका क्रममा उनले चित्तबुझ्दो जवाफ नदिएको भन्दै समितिले उनको अनुमोदनसम्बन्धमा निर्णय गरेको थिएन । 

बिहीवारको सुनुवाई समितिको बैठकले दोस्रो दिन (शुक्रवार) निर्णय गर्ने भनेको थियो । तर शुक्रवार पनि समितिको बैठक बसेन । आइतवार बस्ने भनेको बैठक पनि स्थगित भयो । 

जोशीको शैक्षिक योग्यताका प्रमाणपत्र नक्कली रहेको भन्दै संसदीय समितिमा उजुरी परेको थियो । सुनुवाईका क्रममा सांसदहरुले प्रमाणपत्रबारे जवाफ मागेपनि जोशीले भने त्यसबारे प्रस्ट जवाफ दिएका थिएनन् । 

राजीनामा गर्न सत्तापक्षको सन्देश

प्रधानन्यायाधीशका लागि सिफारिस भएका जोशीलाई सत्तापक्षले भने राजीनामा दिएर निकाश निकाल्न सन्देश दिएको जानकारी लोकान्तरलाई प्राप्त भएको छ । 

सत्तारुढ दल नेकपाको उच्च स्रोतले जोशीलाई राजीनामा दिएर देखिएको समस्याको समाधान गर्न सन्देश पठाइएको बतायो । 

‘नेपालको न्यायिक इतिहासमा सुनुवाईबाट अनुमोदन नभएका प्रधानन्यायाधीशका रुपमा आफ्नो नाम नलेख्न भनेर हामीले राजीनामा दिन सन्देश पठाएका छौं,’ नेकपाको उच्च स्रोतले लोकान्तरसँग भन्यो । 

कामु प्रधानन्याधीश जोशीले पदबाट राजीनामा नदिए सोमवारको संसदीय सुनुवाई विशेष समितिको बैठकबाट उनको नाम अनुमोदन हुने संभावना कम छ । 

सुनुवाइ समितिमा नेकपासहित संसदीय फोरम गरी सक्षापक्षको दुईतिहाइ बहुमत छ । समितिका दुईतिहाइ सदस्यले जोशीको नाममा असहमति जनाए उनको अनुमोदन हुन सक्दैन ।