बुटवल – ५ नम्बर प्रदेश सरकारले राष्ट्रिय गौरवका आयोजना निर्माणकोे अवस्थाबारे जानकारी लिएको छ ।

आयोजनाको निर्माण कार्य सुस्त भइरहेको जनगुनासो बढिरहँदा मुख्यमन्त्री कार्यालयमा मंगलवार आयोजित छलफल कार्यक्रममा मुख्यमन्त्री शंकर पोखरेलले प्रदेशमा सञ्चालित राष्ट्रिय गौरवका आयोजनाका कामको प्रगतिका सम्बन्धमा आयोजना प्रमुखसँग जानकारी लिएका हुन् ।

प्रदेशका सबै मन्त्री र सचिवसमेतको उपस्थितिमा मुख्यमन्त्री पोखरेलले आयोजनाका प्रमुखसँग आयोजनामा अहिलेसम्म भएको काम, खर्च, बाँकी काम र परियोजना सम्पन्न गर्न लाग्ने समय तथा रकमका सम्बन्धमा जानकारी लिएका थिए ।

प्रदेशमा राष्ट्रिय गौरवका आयोजनाका रूपमा रुपन्देहीमा गौतमबुद्ध क्षेत्रीय अन्तर्राष्ट्रिय विमानस्थल, लुम्बिनी गुरुयोजना, बर्दिया र बाँकेमा बबई सिँचाइ आयोजना, भेरी बवई डाइभर्सन आयोजना तथा तराईका जिल्लालाई सडक यातायातको सञ्जालसँग जोड्न सञ्चालित हुलाकी राजमार्गजस्ता महत्वपूर्ण आयोजना सञ्चालित छन् ।

छलफलमा आयोजनाका प्रमुखले निर्माणका सन्दर्भमा देखिएका समस्याका बारेमा जानकारी गराउँदै अब निर्माणमा ढिलाइ नहुने प्रतिबद्धता जनाएका थिए । गौतमबुद्ध अन्तर्राष्ट्रिय विमानस्थल आयोजना प्रमुख ओम शर्माले १० महिनाभित्र सञ्चालन गर्ने गरी विमानस्थल निर्माणको काम भइरहेको जानकारी गराए । उनले मुआब्जाको करीब ६ अर्ब रुपैयाँ समयमै निकासा हुनुपर्ने बताए । 

लुम्बिनी विकास कोषका योजना प्रमुख सरोज भट्टराईले ४ दशकदेखि निर्माणको क्रममा रहेको लुम्बिनी गुरुयोजनाको ८० प्रतिशत काम सम्पन्न भएको र बाँकी काम पाँच वर्षभित्र सक्ने गरी काम भइरहेको बताए । 

बबई सिँचाइ आयोजनाका प्रमुख कुञ्जनभक्त श्रेष्ठ, सिक्टा सिँचाइ आयोजनाका वरिष्ठ इन्जिनियर प्रवीण श्रेष्ठ, भेरी बबइ डाइभर्सन आयोजनाका प्रमुख ओमप्रकाश पुडासैनी लगायतले आयोजनाका अहिलेसम्मको प्रगति र काम गर्दाका समस्या सम्बन्धमा मुख्यमन्त्री पोखरेललाई जानकारी गराएका थिए ।