काठमाडौं – इन्डोनेसियाको एक किन्डरगार्टेन विद्यालयले बालिकाहरूलाई आईएस आतंकवादीहरूले लगाउने कालो लुगा लगाएर नक्कली राइफल बोक्न लगाएको छ । स्वतन्त्रता दिवसका अवसरमा निकालिएको यो परेडपछि आयोजकहरूलाई माफी माग्न बाध्य पारिएको छ । 

पूर्वी जाभाको प्रोबोलिंग्गो शहरमा शनिवार सांस्कृतिक परेड आयोजना गरिएको थियो । लाइन लागेका बालिकाहरू निकाब जस्तो कालो लुगा भिरेर कागजले बनाएको नक्कली बन्दुक बोकेर सडकमा निस्केका थिए । 

टीके कार्तिका किन्डरगार्टेनका प्रमुखले बालिकाहरूलाई यस्तो कपडा लगाउन दिइएकोमा माफी मागे र बच्चाहरूमा हिंसाको बीजारोपण गर्ने आफ्नो उद्देश्य नरहेको बताएका छन् । 

‘हामीले पैगम्बरको संघर्षको विषय उठाएर अल्लाहप्रतिको आस्था र भक्ति बढाउन खोजेका हौं,’ किन्डरगार्डन प्रमुख हार्टाटिकले बताए । 

प्रोबोलिंग्गो किन्डरगार्टेन इन्डोनेसियाली सैनिक परिसरमा पर्छ र शनिवारको परेड स्वतन्त्रता दिवसको एक दिनपछि आयोजना गरिएको थियो । 

किन्डरगार्टेनले यस्तो पहिरन किन छानेको भनी सोध्दा हार्टाटिकले पैसा बचाउन अघिल्ला वर्षहरूबाट कपडा निकालिएको बताए । 

उनले अघिल्ला वर्षमा किन जिहादी शैलीका कपडा प्रयोग गरिएको भन्ने विषयमा कुनै व्याख्या गरेनन् । 

इन्डोनेसियामा एसियन गेम्स चलिरहँदा यस्तो घटना सार्वजनिक भएपछि देशकै बेइज्जती भएको बताइएको छ । इन्डोनेसियाली संसद्का सभामुख बाम्बाङ सोएसात्योले यो ‘अनुपयुक्त दृश्य’ भएको टिप्पणी गरे ।

एजेन्सी