कात्तिक २४, २०८०
राजधानी काठमाडौंबाट कयौं सय माइल टाढा रहेका जाजरकोट र रुकुम पश्चिम यतिबेला भूकम्पले इतिहासकै सर्वाधिक पीडामा छन् । गोधूलि साँझसँगै ओठ काँप्ने जाडो शुरू हुन थाल्छ । आमाको मजेत्रोमा लपेटिएका बच्चाहरू चि...
पत्रकार कमला हमाल र राजु बस्नेतलाई साइबर क्राइममा पक्राउ गरिँदा नेपाल पत्रकार महासंघको वर्तमान नेतृत्व करीब मौन छ । जगजाहेर तथ्य के हो भने महासंघको वर्तमान नेतृत्व गुट सत्तारुढ नेकपाका निकट छ । पत्रकार हमाल र बस्नेतलाई थुनाउन सत्तारुढ नेकपाका नेता कार्यकर्ताकै भूमिका रहेको देखिन्छ ।
नेकपाइतरका पत्रकार पक्राउ परेकाले महासंघले उनीहरूलाई छुटाउन खासै चासो नदेखाएको हो कि ? भन्ने प्रश्न पनि पत्रकारमाझ उठिरहेको छ । पत्रकार महासंघले पत्रकारमाथि दलीय आग्रह पूर्वाग्रह राख्नु हुँदैन ।
प्रेस काउन्सिल र अदालतको समेत प्रक्रिया नपुर्याइ प्रहरीले पत्रकारलाई सोझै हतकडी लगाएर थुन्नु कुनै पनि लोकतान्त्रिक मुलुकका लागि विभत्स दृश्य हो । यस्तो दृश्य इदी अमिन, मुसोलिनी या स्टालिनको निरंकुश फाँसीवादी शासनमा मात्र देखिन्थ्यो । पत्रकार भनेको ‘वाचडग’ हो । पत्रकारहरूको छाता संगठन महासंघ ती सबै ‘वाचडग’हरूको पनि ठूलो ‘वाचडग’ हो ।
सरकारले मुलुकी फौजदारी र देवानीसंहितामा प्रेस तथा अभिव्यक्ति स्वतन्त्रता सम्बन्धमा कस्ता प्रावधान ल्याउँदैछ भनेर ऐन जारी हुनुअघि नै चियो गर्ने, जानकारी राख्ने र प्रेसविरोधी प्रावधान समावेश गर्नै नदिने भूमिका पत्रकार महासंघले निर्वाह गर्नुपर्थ्यो । ‘खबरदार प्रेसविरोधी प्रावधान नराखियोस्’ भनेर सरकारसँग पहिल्यै लबिङ गर्नुपर्थ्यो ।
महासंघबाट ऐन तर्जुमाका क्रममा यस खालको भूमिका निर्वाह भएन । ऐन बाहिर आएपछि पत्रकारहरू आक्रोशित भए । सर्वत्र प्रेसविरोधी प्रावधानको विरोध भयो । अनि बाध्य भएर महासंघले विज्ञप्ती जारी गर्दै प्रेस तथा अभिव्यक्ति स्वतन्त्रता कुण्ठित गर्ने प्रावधान सच्याउन माग गर्यो ।
पत्रकारहरूको तीव्र असन्तुष्टि देखेपछि महासंघले चरणबद्ध संघर्षका कार्यक्रम घोषणा गर्यो र यही भदौ ३१ देखि दबाबमूलक संघर्षको कार्यक्रम हुँदै थियो ।
दोहोरो मापदण्ड
पत्रकार महासंघको संघर्षको कार्यक्रम घोषणा भइरहेकै बेला उस्तै माग राखेर नेपाल चिकित्सक संघ पनि संघर्षमा उत्रियो । चिकित्सकहरूले आकस्मिक बाहेकका सेवा बन्द गरे । अन्ततः चिकित्सकसामु सरकार झुक्यो र उनीहरूका सबै माग पूरा गर्न तयार भयो । चिकित्सकले चाहेबमोजिम ऐनमा सुधार गर्न सरकारले संशोधन प्रस्तावसमेत तयार गरेर प्रक्रिया अघि बढाइसकेको छ ।
पत्रकारका मागका हकमा भने सरकारले बेग्लै मोडलबाट डिल गर्न खोजिरहेको छ, जसले अनेक आशंका उत्पन्न भएका छन् । सरकारले चिकित्सक संघका माग सम्बोधन गर्ने क्रममै पत्रकार महासंघका माग पनि सम्बोधन गरेर प्याकेजमै समाधान गर्नसक्थ्यो । पत्रकार महासंघले प्रेस तथा अभिव्यक्ति स्वतन्त्रता कुण्ठित गर्ने प्रावधान सच्याउन गत भदौ २० मा सरकारसमक्ष १२ बुलेट सुझाव पेश गरिसकेको हो ।
सोही सुझाव भदौ २१ मा संसदका सभामुखलाई समेत बुझाइसकिएको छ । सरकारले पत्रकारहरूको साझा संस्था महासंघका सुझावकै आधारमा ऐनमा संशोधन गर्नसक्थ्यो, तर त्यसो नगरी पत्रकारलाई अल्मल्याउने चाल रचियो ।
सरकारले मंगलबार ऐनमा के कस्तो सुधार या संशोधन गर्ने भनेर सुझाव दिन देवप्रकाश त्रिपाठीको संयोजकत्वमा एक कार्यदल गठन गरेको छ । पत्रकारहरू भदौ ३१ देखि शुरू हुने दबाबमूलक आन्दोलनको तयारीमा जुटिरहेकै बेला गठन गरिएको यो कार्यदलमा मुलुकका मूलधारका मिडियाका, पत्रकारिताको लामो अनुभव भएका र प्रेस स्वतन्त्रताका पक्षमा विशेष योगदान दिएका मिडियाकर्मी कमै छन् ।
हुन त केही समयअघि गोदावरीमा ठूला मिडियाका सम्पादकहरूसँगको अन्तरक्रियामा महासंघका अध्यक्ष गोविन्द आचार्यले प्रेसविरोधी प्रावधान सच्याउनेबारे सल्लाह लिन पत्रकारहरूको प्रबुद्ध समूह गठन गर्ने आश्वासन पनि दिएका थिए । तर त्यस्तो प्रबुद्ध समूह गठन नगरी आफू अनुकुलका ‘मित्र’हरूलाई राखेर ४५ दिने म्यादधारी सरकारी कार्यदल गठन गर्न उनी सफल भएका छन् ।
कार्यदल किन ?
प्रेस विरोधी ऐनमा संशोधन गर्ने सरकारको नियत हुन्थ्यो भने उसले शुरूमा पत्रकार महासंघसँग वार्ता प्रक्रिया प्रारम्भ गर्ने थियो । महासंघले पहिले नै १२ बुलेट सुझाव पेश गरिसकेको थियो र त्यसलाई नै आधार बनाउन सकिन्थ्यो ।
पंक्तिकारलाई सूचना भएअनुसार हालसम्म सरकार र महासंघका प्रतिनिधिबीच आधिकारिक रूपमा वार्ता भएकै छैन । महासंघ र सरकारबीच द्विपक्षीय वार्ता नभई महासंघका अध्यक्षको निजी पहलमा कार्यदल गठन भएको देखिन्छ, जसका पछाडि अनेक कारणहरू हुनसक्छन् ।
एक त, प्रेस सोसाइटी र प्रेस चौतारी लगायतका नेकपा कोटरीभित्रकै संस्थाहरूले महासंघको वर्तमान नेतृत्वलाई विश्वास गरिरहेको पाइँदैन । भदौ २२ मा नयाँ बानेश्वरमा आयोजित सञ्चार उपकरणसहितको प्रदर्शनमा चौतारी र सोसाइटीका नेताहरू उपस्थित नभएको घटना यहाँ स्मरणीय छ । अतः अध्यक्षले बाहिरका मिडिया नेताहरूलाई आफ्नो विश्वासमा लिन खोजेको देखिन्छ ।
मुख्यकारण चाहिँ भदौ ३१ को आन्दोलन निस्तेज पार्ने नियत नै यसमा देखिन्छ । महासंघको वर्तमान नेतृत्व सत्तानिकट भएकाले यो आफैं आन्दोलनको मानसिकतामा देखिँदैन । उदेक लाग्दो कुरा के छ भने महासंघको वर्तमान नेतृत्व पूर्वमाओवादी र नेपाली कांग्रेस निकट पत्रकारहरूबीचको गठबन्धनबाट बनेको हो । प्रेस सोसाइटी र प्रेस युनियनको गठबन्धनबाट बनेको भए पनि यसबीचमा सत्ता राजनीति बदलियो ।
अहिले प्रेस चौतारी र प्रेस सोसाइटीवालाहरू एउटै दल नेकपा निकट भएका छन् । महासंघका अध्यक्ष नेकपानिकट भए पनि महासंघमा प्रेस युनियन निकट पदाधिकारीसँग उनले सहकार्य गरिरहनुपरेको छ । यही कारण अध्यक्षले सबै पदाधिकारीलाई आफ्नो प्रभावमा राखेको हुनसक्छ ।
अध्यक्षलाई किन चिड्याउने भन्ने भावले प्रेस स्वतन्त्रतामाथि चौतर्फी प्रहार भइरहँदा, पत्रकारहरूलाई हतकडी लगाएर थुन्ने काम भइरहँदा पनि लोकतान्त्रिक खेमाका भनिएका पदाधिकारी र सदस्यहरू दिल खोलेर विरोधमा उत्रन सकिरहेका छैनन्, जुन उनीहरूको निरीहता हो ।
शासन सत्तामा आफ्नो दल बिराजमान भएकाले महासंघ नेतृत्वको रजगज हुने नै भयो । विदेश भ्रमणका निम्ताहरू आइरहेकै होलान् । अमेरिकादेखि कोरियासम्मका पत्रकारहरूले डाकिरहेकै होलान् । यो अस्थीर मुलकमा सरकार कुनबेला ढल्ने हो, यहाँ कतिबेला के हुने हो कसले भन्नसक्छ ? त्यसैले यही मौकामै देशविदेश घुम्नुपर्छ भन्ने मानसिकताले पनि काम गरेको हुनुपर्छ । विदेश घुम्ने मौका छाडेर स्वदेशमै प्रेस स्वतन्त्रताको संघर्ष गर्ने मूडमा महासंघ नेतृत्व खासै आतुर नदेखिएको हुनसक्छ ।
कार्यदल गठन गरेर सारा मुद्दा त्यसकै थाप्लोमा हालिदिएपछि महासंघलाई हल्का हुने नै भयो । ४५ दिनसम्म आन्दोलनका कुरा पनि थाती रहने भो । यसबीचमा यसो मौका परे विदेश घुम्न पनि पाइने भो । पत्रकारको गनगन सुनेर सरकारको टाउको पनि दुःख्ने भएन । केही ‘मित्र’हरूले पद र प्रतिष्ठा पनि पाउने भए । कार्यदल गठनका पछाडि यस्तै यस्तै नियत लुकेको छैन होला भनेर कसरी भन्ने ?
अतः कार्यदलका यस्ता भुलभुलैयामा नपरी प्रेस स्वतन्त्रताका पक्षमा दरिलो गरी उभिनु पत्रकार जगतको आजको धर्म हो । यो सरकार फासीवादी हुँदैछ, प्रेसको घाँटी निमोठ्दैछ । नेकपाइतरका पत्रकारलाई योजनाबद्ध रूपमा धमाधम पक्रने र विरोधी आवाज दबाउने षड्यन्त्रमा सरकार जुटिसकेको छ । यस्तो बेला प्रेस तथा अभिव्यक्ति स्वतन्त्रताको पक्षमा दरिलो गरी उभिने ‘वाचडग’ हुनुपर्नेमा पत्रकार महासंघ सत्ताको चास्नीमा डुबेको ‘झिंगा’सरह भएको छ ।
उखान टुक्काप्रेमी ओली सरकारलाई यो उखान थाहा नहुने कुरै आएन, ‘झिंगाको श्रापले डिंगा पर्दैन ।’
राजधानी काठमाडौंबाट कयौं सय माइल टाढा रहेका जाजरकोट र रुकुम पश्चिम यतिबेला भूकम्पले इतिहासकै सर्वाधिक पीडामा छन् । गोधूलि साँझसँगै ओठ काँप्ने जाडो शुरू हुन थाल्छ । आमाको मजेत्रोमा लपेटिएका बच्चाहरू चि...
डिसेम्बर पहिलो साता एनसेलको माउ कम्पनी आजियाटाले आफ्नो रेनोल्ड होल्डिङ्स यूकेको शतप्रतिशत स्वामित्व गैरआवासीय नेपाली सतिशलाल आचार्यको कम्पनी स्पेक्ट्रलाइट यूकेलाई बेच्न गरेको सम्झौताबारे समाचार बाहिरिएको झन्डै ३ हप्...
कमेडी क्लब चलाउने मुन्द्रे उपनाम गरेका एकजना मान्छे छन्। एकै श्वासमा चारवटा प्रश्न सोध्न सक्ने क्षमता भएका जानेमाने पत्रकार ऋषि धमलाको कार्यक्रममा पुगेर तिनले भन्न भ्याए, 'यो टिकटकका कारण मान्छेहरू अल्छी भए, कुन...
केही वर्षअघि विद्वान प्राध्यापक डा. अभि सुवेदीले कान्तिपुरमा लेख्नुभएको एउटा प्रसंगबाट आजको चर्चा शुरू गर्नु उपयुक्त हुनेछ । त्यस प्रसंगमा नेपाली कांग्रेसका वर्तमान सभापति शेरबहादुर देउवाले पूर्व प्रधानमन्त्रीको हैस...
गरिबको घरआँगन कसैलाई मन पर्दैन । गरिबको लुगाफाटो कसैलाई मन पर्दैन । गरिबले ठूला कुरा गरेको कसैलाई मन पर्दैन । गरिब नाचेको, गरिब हाँसेको कसैलाई मन पर्दैन । यतिखेर गरिबले लडेको जनयुद्ध दिवस पनि कसैलाई मन ...
आज ‘सबैका लागि मर्यादित जीवन’ को आदर्श वाक्यसाथ अन्तर्राष्ट्रिय गरिबी निवारण दिवस मनाइँदै छ । भोक, रोग, अभाव र आवश्यकता पूरा भएपछि मात्र मानवीय मर्यादा पाउन सकिन्छ । नेपालमा गरिबी र असमानताका विभि...
ललितपुरको गोदावरीस्थित सनराइज हलमा नेकपा (एमाले)का दुई महत्वपूर्ण कार्यक्रम भए । एमालेको प्रथम विधान महाधिवेशन (२०७८ असोज १५ र १६ गते) सनराइज हलमै भएको थियो । विधान महाधिवेशनले विभाजनदेखि चौतर्फी घेराबन्दी...
हामी १५औं अन्त्य गरेर १६औं योजनाको तयारीमा जाँदै छौं । दलका शीर्ष नेताबीच १६औं योजनाको विषयमा छलफल भएको छ । १५औं योजनाको असफलता र नमिलेका कुरालाई १६औं मा सुधार्छौं । हाम्रो गन्तव्य कहाँ हो भन्ने संविधानले ...
सच्चा लोकतन्त्रमा सिमान्तमा रहेको नागरिकले पनि यो देश मेरो हो भन्ने अनुभूति गर्न सक्नेछ- माहात्मा गान्धी । माथि गान्धीको भनाइ किन उद्धृत गरिएको हो भने नयाँ वर्षको आगमन भैसकेको छ र २०८० को बिदाइ बडो हर्षपूर्वक...