बुटवल – रुपन्देहीको तिलोत्तमामा विषालु सर्पको टोकाईबाट एकै घरका २ जनाको मृत्यु भएको छ ।

मृत्यु हुनेमा तिलोत्तमा– ६ गणेशपुरका सुस्मिता सुवेदी र सौगात सुवेदी रहेका छन । सुस्मिता र सौगात दिदीभाइ हुन् ।

शनिवार राति घरमै सुतिरहेको अवस्थामा उनीहरूलाई सर्पले टोकेको थियो । दुवै जनालाई आइतवार बिहान गम्भीर अवस्थामा अस्पताल भर्ना गरिएको थियो । लुम्बिनी अञ्चल अस्पताल बुटवलमा उपचारका क्रममा उनीहरूको मृत्यु भएको हो ।

मृतक दिदीभाइ तिलोत्तमास्थित शान्ति नमूना माविमा अध्ययनरत विद्यार्थी हुन् । सुस्मिता ४ कक्षा र सौगात १ कक्षामा अध्ययनरत विद्यार्थी रहेको विद्यालयका शिक्षक कृष्ण केसीले जानकारी दिए । दुवै सन्तानको निधनपछि परिवार शोकमा  डुबेको छ ।

तराईमा असोज लागेपछि गर्मी बढेको छ । गर्मी बढेसँगै सर्पदंशका बिरामी बढ्न थालेका छन् । समयमै अस्पताल पुर्याएर औषधि उपचार गर्न नपाउँदा बिरामीको मृत्यु हुने गर्छ ।