बुटवल – तिलोत्तमा नगरपालिकाले बजार अनुगमनलाई नियमित गरेको छ ।

मुलुकको संघीय संरचनाअनुसार स्थानीय तहलाई प्राप्त अधिकारको प्रयोग गरी नगरपालिकाले निर्देशिका नै निर्माण गरेर बजार अनुगमनको कामलाई नियमित गरेको हो ।

यसअघि, जिल्लास्तरबाट हुने अनुगमनको काम अहिले स्थानीय तहबाटै हुन थालेका छन् । यसैक्रममा शुक्रबार नगरपालिकाको अनुगमन टोलीले ड्राईभर टोलमा रहेका विभिन्न पसलमा अनुगमन गरेको छ । 

अनुगमनका क्रममा टोलीले दर्ताविना सञ्चालनमा रहेका व्यापार–व्यवसायलाई दर्ता हुन, होटल तथा रेस्टुरेन्ट, मिष्ठान्न भण्डार, मासु पसललाई सरसफाईमा विशेष ध्यान दिन, ढक तराजुलाई ठीक तरिकाले प्रयोग गर्न सुझाएको अनुगमनमा सहभागी नगरपालिकाका प्रमुख प्रशासकीय अधिकृत कृष्णप्रसाद सापकोटाले जानकारी दिए ।

टोलीले प्लास्टिक झोलाको प्रयोगलाई न्यूनीकरण गर्न पनि व्यावसायीलाई आग्रह गरेको छ । अनुगमन टोलीका संयोजक चेतनारायण भण्डारीले बजार अनुगमन क्रमशः नगरका अन्य स्थानलाई पनि गरिने बताए ।

तिलोत्तमा नगरपालिकाको बजार अनुगमन निर्देशिका–२०७४ अनुसार बजार अनुगमन गर्नका लागि नगरकार्यपालिका सदस्य भण्डारीको संयोजकत्वमा बजार अनुगमन टोली गठन गरिएको छ ।

बजार अनुगमन निर्देशिकाअनुसार उपभोक्ताको हित संरक्षणसम्बन्धी विषयमा आवश्यक नीतिगत व्यवस्था गर्न तथा बजार अनुगमन कार्यलाई मार्गदर्शन एवं समन्वय गर्न उपभोक्ता हित संरक्षण समिति गठन गरिएको छ । 

उपभोक्ता हित संरक्षण समितिले उपभोक्ता हित संरक्षणका लागि आवश्यक नीतिगत व्यवस्था, अत्यावश्यक वस्तुको माग र आपूर्तिको अवस्थासम्बन्धी तथ्यांक संकलन र मागको प्रक्षेपण गर्छ । वस्तु वा सेवा प्रदायक व्यवसायको दर्ता, नवीकरण, आपूर्ति, मूल्य, नापतौललगायत व्यापारिक क्रियाकलापको नियमित एवं आकस्मिक अनुगमन गर्न निर्देशिकाअनुसार नगरपालिकामा बजार अनुगमन टोली क्रियाशील भएको हो ।

अनुगमन गरिने वस्तुमा खाद्यान्न, माछामासु, तरकारी, दैनिक उपभोग्य वस्तु, औषधि एवं स्वास्थ्य सेवा, रासायनिक मल, विषादी, बिउ बिजन, कृषि औजार, इन्धन, निर्माण सामग्री, शैक्षिक सामग्री, होटेल, लज, रेस्टुराँ, खाजाघर लगायतका अन्य क्षेत्र समेटिएका छन् ।