काठमाडौं –प्रदर्शनरत चलचित्र ‘छक्का पञ्जा ३’ले आक्रामक व्यापार गरेको छ ।

वितरकले लोकान्तरलाई दिएको जानकारीअनुसार चलचित्रले आफ्नो प्रदर्शनको चौथो दिनसम्म आइपुग्दा पाँच करोडभन्दा बढीको ग्रस कलेक्सन गरेको छ । 

बुधबारदेखि प्रदर्शनमा आएको चलचित्रले चार दिनमा उपत्यकाभित्र २ करोड ९० लाख र उपत्यकाबाहिर २ करोड ५० लाख गरी पाँच करोड ४० लाख ग्रस कलेक्सन गरेको वितरकले जानकारी दिए ।

चलचित्रले शनिवार मात्र उपत्यकाभित्रबाट १ करोड १५ लाख ग्रस कलेक्सन गरेको उपत्यका वितरक मनोज राठीले बताए ।

त्यस्तै उपत्कारबाहिर शनिवार चलचित्रले १ करोड ग्रस कलेक्सन गरेको वितरक नरेन्द्र महर्जनले बताए । आइतबार पनि बिहीवार र शुक्रबारकै रेञ्जमा हलमा दर्शकहरूको चाप रहेको उनले बताए । 

रिलिजको पाँचौं दिन आइतबार पनि हलमा दर्शकको उल्लेखनीय चाप छ । दीपाश्री निरौला निर्देशित चलचित्रले शिक्षा क्षेत्रको बेतिथिको कथा वाचन गरेको छ ।

चलचित्रमा दीपकराज गिरी, दीपिका प्रसाईँ, केदार घिमिरे, जितु नेपाल, बुद्धि तामाङ, शिवहरी पौडेल, विल्सन विक्रम राई लगायतका कलाकारहरूको अभिनय छ ।

दीपाश्री निरौला, प्रियंका कार्की, संजोग कोइराला, वर्षा राउत, स्वस्तिमा खड्का अतिथि भूमिकामा छन् । चलचित्र व्यानरको ब्राण्ड, स्टार कलाकार, गीतसंगीत र ट्रेलरका कारण दर्शकमाझ प्रतिक्षित थियो ।