काठमाडौं — एक माछाका कारण फिलिपिन्सका पाँच माझीको ज्यान मुश्किलमा परेको छ । यी माझीहरू दक्षिण चीन सागरमा माछा पक्रिन गएका थिए ।

त्यहाँ दुर्लभ मार्लिन माछाले डुंगामा प्वाल पारिदियो । पाँचै माझीहरू दुई दिनसम्म समुद्रमा फसे र उनीहरूको खानेकुरा पनि सकियो । 

माझीहरूले आफूसँग बाँकी रहेका काठ जोडेर राफ्ट तयार पारे र त्यसैमा तैरिएर किनारमा आए । 

एक माझी जिमी बाटिलरले आफ्नो अनुभव यसरी बाँडे, ‘चारजना साथीसँग एक हप्ताअघि म दक्षिण चीन सागरमा माछा समात्न गएको थिएँ । केही दिनपछि नै बिहानीपख डुंगामा दुर्लभ मार्लिन प्रजातिको माछा हात प¥यो । चुच्चो थुतुनो
भएको मार्लिनलाई समात्ने हाम्रो प्रयास विफल भयो । रिसाएको माछा जालबाट फुत्केर डुंगामा आयो र चुच्चोले घोचीघोची डुंगामा प्वाल पारिदियो ।’

जिमी थप्छन्, ‘हाम्रो डुंगा हल्काफुल्का थिएन । त्यो १२ फीट लामो र समुद्रका पाँचौ स्तरको लहरलाई झेल्न सक्ने क्षमता भएको डुंगा थियो । तर ६ फीट लामो र ८०० किलो तौल भएको मार्लिन माछाले त्यसमा प्वाल पारिदियो ।
हामीहरू घन्टौंसम्म प्वाल परेको डुंगा चलाइरह्यौं र डुंगामा बिस्तारै पानी भरिँदै आयो र लहर चर्को हुँदै गएपछि अघि बढ्न मुश्किल भयो । हामी एक दिन त पानीमा बस्यौं । तर यात्रा पनि सकिने बेला भएको थियो र हामीसँग खाना र
पानी सकिँदै गएको थियो ।’

पछि जिमी र उनका साथीहरू डुंगामा भएका काठ र केही डोरीलाई जोडेर बलियो राफ्ट बनाउन सफल भए । उनीहरूले आवश्यक सामान राफ्टमा राखे र सफलतापूर्वक किनारमा आइपुगे । एउटा जहाजले उनीहरूलाई रेस्क्यु बोट पठाइदियो । 

उनीहरू त्यसैमा चढेर पश्चिम मनिला तट पुगे । त्यहाँ उनीहरूको परिवारले प्रतीक्षा गरिरहेको थियो । 

एजेन्सी