काठमाडौं – नेपालीको महान् पर्व विजयादशमीसँगै मनोहरा नदी तथा हनुमन्ते नदी सफाइ अभियानलाई निरन्तरता दिँदै शनिवार ३ टन फोहोर संकलन गरिएको छ । 

काठमाडौं, भक्तपुर र ललितपुरको संगमस्थलमा शनिवार भएको मनोहरा सफाइ सम्पदा बचाउन महाअभियानको ८४ औं हप्ता तथा हनुमन्ते नदी सफाइ अभियानको ३४ औं हप्ताको संयुक्त कार्यक्रम सम्पन्न भएको हो । 

अभियानमा नेपाल चलचित्र बोर्डका अध्यक्ष, त्रिपुरा संगम समाज तथा हनुमन्ते नदी सफाइ अभियानका सल्लाहकार स्व. रामकेशर बोगटीको निधनको शनिवार १२ औं दिनमा उनीप्रति भावपूर्ण श्रद्धाञ्जलि अर्पण गर्दै सफाइ कार्यक्रम गरियो । 

कार्यक्रममा नेपाल कम्युनिस्ट पार्टी (नेकपा) का केन्द्रीय सदस्य एवं प्रतिनिधिसभाका सांसद महेश बस्नेतले स्व. बोगटीका योजना तथा अधुरा काम सम्पन्न गर्नु नै उनको सच्चा श्रद्धाञ्जलि हुने बताए ।

कार्यक्रममा संघीय मामिला तथा स्थानीय विकास मन्त्रालयका सचिव दिनेशकुमार थपलियाले बोगटीले चलचित्रको माध्यमबाट नेपाललाई विश्वसामु परिचित गराउँदै चलचित्र क्षेत्रलाई व्यवसायिक तथा प्रतिस्पर्धी बनाउन सफल भएका बताए ।

नेपाली सेना, नेपाल प्रहरी, स्थानीय जनप्रतिनिधि, विभिन्न संघसंस्था तथा स्थानीय गरी करीब २ सय जना रहेको सफाइ अभियानबाट शनिवार करीव ३ टन फोहोर संकलन गरिएको मनोहरा सफाइ सम्पदा बचाउ महाअभियान तथा हनुमन्ते नदी सफाइका उत्प्रेरक रुद्र पौडेलले बताए ।