सुर्खेत– आठबीस नगरपालिकाले युवालाई स्वरोजगार बनाउन लगानी गर्ने भएको छ । आठबीस नगरक्षेत्रका अधिकांश युवा भारततर्फ जाने गरिरहेका बेला नगरपालिकाले ती युवालाई स्वरोजगार बनाउन लगानी गर्ने योजना बनाएको हो । 

लोकान्तरसँग कुरा गर्दै आठबीस नगरपालिकाका नगरप्रमुख खड्गराज उपाध्यायले आठबीस समृद्ध बनाउन युवालाई सवरोजगार बनाउनुपर्ने बताए । आठबीस समृद्ध बनाउन युवालाई उत्पादनसँग जोडन आवश्यक छ । उनले भने, ‘त्यसैले यो वर्षदेखी नगरपालिकाले युवाहरुलाई उत्पादनसँग जोडिन चाहने युवाहरुलाई आफुले गर्न चाहेको काम, आवश्यक पर्ने बजेटसहितको योजना नगरपालिकामा पेश गरेमा हामी लगानी गर्न तयार छौं ।’

नगरप्रमुख उपाध्यायले आठबीस नगरपालिकाको वडा नं. १ देखि वडा नं. ५ सम्म रहेको कर्णाली राजमार्गको कुनै पनि स्थानमा अर्गानिक खाना खुवाउने गरी होटल सञ्चालन गर्न चाहेमा पनि नगरपालिका लगानी गर्न तयार रहेको बताए । ‘यो समय पर्यटनको हो । रारा जाने सयौं यात्रु अर्गानिक खाना खान चाहन्छन् ।’ उनले भने, यदि कोही युवाले अर्गानिक होटल सञ्चालन गर्छु भनेर आएको खण्डमा नगरपालिका लगानी गर्न तयार छ । तर, उनले उक्त होटलमा पुरै अर्गानिक बस्तुहरुमात्रै राख्न मिल्ने बताए ।

‘यहाँ अर्गानिकको नाममा अन्य वस्तु खुवाइँदै आइएको पाइएको छ ।’ उनले भने, तर हामीले लगानी गरेको होटलमा अर्गानिक बाहेक अन्य बस्तु ल्याउन पाइने छैन र उपभोक्ता अथवा ग्राहकलाई अर्गानिक बाहेक अन्य वस्तु विक्री गर्न पाइने छैन । उनले नगरपालिकाले ७० प्रतिशत लगानी गर्ने बताए । 

कोही युवाले यस्तो काम गर्छु भनेर आएको खण्डमा ७० प्रतिशत तीन पुस्ते विवरण राखेर लगानी गरिनेछ । उनले भने, ‘नगरपालिकालाई उक्त व्यक्तिले आगामी पाँच वर्षभित्र उक्त रकम फिर्ता गरे हुन्छ । काम राम्रो गरेको खण्डमा आवश्यकता अनुसार नगरपालिकाले ऋण मिनाहा पनि गर्न सक्छ ।’

नगरप्रमुख उपाध्यायले लगानी गरेको व्यक्तिले रकम हिना मिना गरेको खण्डमा उसको जति पनि सम्पती छ त्यो नगरपालिकाले जफत गर्ने बताए । ‘हामीले ऋण लगानी गर्दा उसको नाममा भएको लालपुर्जा, उसको नभए उसको बुवाको नाममा भएको लालपुर्जा धरौटी राख्ने छौं ।’ उनले भने, यदि कसैले बदमासी गर्न खोजेको खण्डमा हामी त्यहि जायजेथा विक्री गरेर भएपनि हामी नगरपालिकाको ऋण असुली गर्नेछौं ।

उनले रारा जाने पर्यटकका लागि स्तरीय खानाको अभाव भइरहेको बताए । ‘हामीसँग मकै, कोदो, सिस्नु, आटो खेर गइरहेको छ ।’ उनले भने, ‘त्यहि खाना मात्रै पर्यटकलाई खुवाउने हो भने युवाहरुलाई रोजगार खोज्न भारत जानु पर्दैन । यहाँ चाउचाउ खानु भन्दा मकै तथा भटमासको खाजा भुटेर पर्यटकलाई खुवाउन सके आम्दान िपनि हुने र पर्यटकको स्वास्थ्य पनि राम्रो हुने पक्का छ ।’