तिलोत्तमामा किसानलाई गहुँको बिउमा ४० प्रतिशत अनुदान

कात्तिक २०, २०७५

बुटवल – रुपन्देहीको तिलोत्तमा नगरपालिकामा किसानलाई अनुदानमा गहुँको बिउ वितरण शुरू भएको छ ।

नगर कार्यपालिकाको ४७औं बैठकको निर्णयअनुसार मंगलबारबाट ४० प्रतिशत अनुदानमा गहुँको बिउ वितरण शुरू भएको हो । 


ADVERTISEMENT

मंगलबारबाट आनन्दवन सहकारी संस्था लिमिटेडले अनुदानको गहुँको बिउ बिक्री शुरू गरेको छ भने कोटिहवास्थित जनविकास सहकारी संस्था लिमिटेडले केही दिनभित्रै बिक्री शुरू गर्ने जनाइएको छ । 

आनन्दवन सहकारीले वडा नं. १ देखि १० र जनविकास सहकारीले वडा नं. ११ देखि १७ सम्म अनुदानमा गहुँको बिउ किसानलाई बिक्री गर्नेगरी व्यवस्था मिलाइएको नगरपालिकाले जनाएको छ । 

मंगलबार मणिग्रामस्थित आनन्दवन सहकारी संस्थामा आयोजित एक कार्यक्रमका बीच नगर प्रमुख बासुदेव घिमिरेले बड्का केवट, हरि कंडेल र टेका प्रसाद अर्याललाई एक÷एक बोरा बिउ उपलब्ध गराएर वितरण कार्य शुरू गरे ।

नगरपालिकाले दुई सहकारीसँगको सहकार्यमा सिफारिस गरिएको उन्नत जातको सुधारिएको गहुँको बीउमा किसानलाई अनुदान दिएको हो । 

नगरपालिकाले अनुदानका विषयमा व्यवस्था मिलाउन १४ नम्बर वडाध्यक्ष सोहनप्रसाद थारुको संयोजकत्वमा पाँच सदस्यीय समिति गठन गरेको छ । 

नगरपालिकाले यस वर्ष करीब ७ सय क्विन्टल अनुदानको गहुँको बिउ किसानले सहकारीमार्फत् लैजाने अपेक्षा गरेको छ । 

गहुँ खेती गर्ने किसानहरुले आवश्यक कागजातको आधारमा अनुदानको बिउ प्राप्त गर्न सक्नेछन् । 

गहुँको बिउ वितरण कार्यक्रममा बोल्दै नगर प्रमुख घिमिरेले किसानलाई व्यवसायिक बनाउन र केही राहत दिन बिउमा अनुदान दिइएको बताए । 

नगरपालिकाको कृषि समितिले किसानलाई अनुदानमा गहुँको बिउ उपलब्ध गराउन सिफारिस गरेको थियो ।

कात्तिक २०, २०७५ मा प्रकाशित

प्रकाश आचार्य

प्रकाश आचार्य लोकान्तरका लागि ५ नम्बर प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस

ताजा समाचार