मुम्बई । भारतीय जनता पार्टी (बीजेपी) ले बलिउड अभिनेत्री माधुरी दीक्षितलाई  आगामी २०१९ मा हुने लोकसभा निर्वाचनमा महाराष्ट्रको पूणेबाट चुनावी मैदानमा उतार्ने तयारी गरेको छ । 

भारतीय सञ्चारमाध्यमले पार्टी स्रोतलाई हवाला दिँदै लेखका छन्–बीजेपी अध्यक्ष अमित शाहले गत जुनमा मुम्बईस्थित उनको आवासमा भेटवार्ता गरेका थिए ।  शाह सो समय पार्टीको ‘सम्पर्कका लागि समर्थन’ कार्यक्रमका लागि मुम्बई पुगेका थिए । सो क्रममा शाहले नरेन्द्र मोदी सरकारको उपलब्धिका बारेमा अभिनेत्री दीक्षितलाई जानकारी गराएका थिए । 

बीजेपीका एक वरिष्ठ अधिकारीका अनुसार पार्टीले माधुरीको नाम पूणे लोकसभा सिटका लागि चयन गरिएको छ । उनले भने, ‘पार्टीले २०१९ को आम चुनावमा माधुरीलाई उम्मेदवार बनाउनको लागि गम्भीरका साथ लागिपरेको छ । पार्टीलाई लागेको छ कि सो सिट माधुरीको लागि उपयुक्त छ ।’

५१ वर्षीया माधुरीले तेजाब, हम आपके है कौन, दिल तो पागल है, साजन और, देवदासहित चर्चित बलिउड फिल्महरुमा काम गरेकी छन् । सन् २०१४ को निर्वाचनमा बीजेपीका अनिल शिरोले तीन  लाख भन्दा बढी मतान्तरका साथ काँग्रेस उम्मेदवारलाई हराएका थिए ।