जनकपुरधाम– भारत उत्तरप्रदेशका मुख्यमन्त्री योगी आदित्यनाथ आउनु भन्दा एक दिन अघि नै भारतीय विमानले परीक्षण उडान (टेस्ट फ्लाइट)गरेको छ । मंगलबार बिहान भारत उत्तर प्रदेशको राजधानी लखनउबाट उडेको भारतीय विमान जनकपुर विमान स्थलमा बिहान १० बजेर १९ बजे अवतरण भएको थियो । 

बीई २० टाइपको भारतीय कम्पनीमा दर्ता भएको बिमान नेपालमा अवतरण भएको केही समयपछि फेरि लखनउ फर्किएको छ ।

जनकपुर विमानस्थलका प्रमुख सन्तोष ढकालले लोकान्तरसंग भने, ‘भारतका उत्तरप्रदेशका मुख्यमन्त्री योगी आदित्यनाथ भोलि जनकपुर आउनु हुने कार्यक्रम रहेकाले परीक्षणका लागि बिमान आज आएको थियो ।’  जनकपुरमा अवतरण गरेको उक्त बिमान ११ः ५० मा पुनः लखनउका लागि प्रस्थान गरेको थियो ।

नेपालको रोयल हिमालयन ट्रेकस कम्पनीले उक्त भारतीय विमान चार्टर गरेको ढकालले बताए । तीन जना चालक दलसहित आएको उक्त विमानका चालक दलले रन वेको लम्बाइ, ले आउट आदीसँग संगै अन्य सुविधाहरूको बारे परीक्षण गर्न आएका थिए, ढकालले भने, ‘उहाँहरू हाम्रो ब्यवस्थाबाट पूर्ण रूपले सन्तुष्ट भएर फर्किनु भएको छ ।’

नर्मल रुट गल्फ ३३५ बाट उडान भरेको उक्त बिमान करीब १ घन्टाको समयमा लखनउबाट जनकपुर आइपुगेको थियो ।

‘भोलि त्यही विमान बाट एक जना इन्जिनियरसहित चार जना चालक दल र मुख्यमन्त्री योगीसहित ५ जना प्रतिनिधि मण्डल आउने जानकारी हामीले प्राप्त गरेका छौं,’ विमानस्थल प्रमुख ढकालले भने, ‘भोलि त्यही समयमा सामान्य हेरफेर गरेर विमान जनकपुर आइपुग्नेछ ।’

बिगतमा भारतका प्रधानमन्त्री नरेन्द्र मोदी जनकपुर आउँदा उहाँलाई भिभिआईपी भनिएको थियो भने योगिजीलाई भिआईपी भनेर नेपाल सरकारद्वारा पत्राचार गरिएको ढकालले जानकारी दिए । 

 नेपाल नागरिक उड्डयन प्राधिकरण बाट आज र भोलिको लागि उक्त बिमान कम्पनीले उडानको अनुमति लिएर नै बिमानले उडान भरेको उनले बताए ।

भोलि उक्त बिमान आउँदा जनकपुरको बुद्ध र येती एयरलाईन्सको नियमित विमानको समय हेरफेर हुने समेत उनले जानकारी गराए । विमानस्थलको सुरक्षाको प्रबन्ध जिल्ला सुरक्षा समिति अनुसार नै प्रबन्ध गरिएको छ । बिमान स्थलमा आपातकालीन सेवाका लागि सिमराबाट एउटा फायर भेहिकल समेत मगाउने काम भईरहेको भए पनि उक्त भेहिकल अहिले बाटोमै रहेको ढकालले बताए ।

एता योगी आउँदा कारगेटका लागि पनि ब्यबस्थापन गरिएको धनुषाका प्रमुख जिल्ला अधिकारी प्रबीणराज कणेलले बताए । ‘बुलेट प्रुफ एउटा कार गेट भारत सरकारले उपलब्ध गराएको छ भने अर्को बुलेट प्रुफ कार गेट नेपाल सरकारले समेत उपलब्ध गराउने छ,’ सिडिओ कणेलले बताए । नेपाल सरकारको कारगेट साँझ सम्म जनकपुर आईपुग्नेछ ।