थारु साहित्यको विकासको लागि अक्षयकोष स्थापना र राष्ट्रिय सम्मेलनको तयारी

मंसिर २९, २०७५

धनगढी – थारु भाषा, साहित्यको संरक्षण, सम्वद्र्धन तथा विकासको लागि अक्षयकोष स्थापना गरिएको छ ।

थारु लेखक संघ नेपाल कैलाली शाखाले ७० हजार ४५० रुपैयाँको अक्षयकोष स्थापना गरेको हो ।


ADVERTISEMENT

कोषलाई १ लाख पुर्याउने संघका केन्द्रीय सदस्य एवं साहित्यकार जीत ट्रासनले जानकारी दिए । कोषबाट आउने व्याज रकमलाई संघले भाषा, साहित्यको विकासमा खर्च गर्ने साहित्यकार ट्रासनले बताए ।

केही वर्षयता थारु लेखक संघले थारु साहित्यकारलाई संगठित गर्दै आएको छ भने थारु साहित्यको विकास र उत्थानको लागि साहित्यिक बहस, थारु भाषाको मानकताको सवाललाई जोडदारमा उठाउँदै आएको छ । 

थारु बाहुल क्षेत्रस्थित स्थानीय तहमा थारु भाषालाई कामकाजी भाषा बनाउने र विद्यालयमा थारु भाषाको पाठ्यक्रम लागू गर्न बहस चलाउँदै आएको जनाइएको छ । दाङको घोराहीमा पहिलो राष्ट्रिय थारु साहित्यिक मेला आयोजना गरेको संघले कैलालीको पटेला, बर्दियाको बह्रैया तालमा पनि साहित्यिक मेलाको आयोजना गरिसकेको छ । 

आउँदो चैत २२ र २३ गते रुपन्देही जिल्लाको सैनामैनामा हुने चौथौं संस्करणको राष्ट्रिय थारु साहित्य सम्मेलनको तयारीमा जुटेको संघका केन्द्रीय अध्यक्ष कृष्णराज सर्वहारीले जानकारी दिए ।

आयोजना हुँदै आएको साहित्यिक सम्मेलनको अवसरमा प्रकाशित भएका किताबको प्रदर्शनी, साहित्यिक बहस, सामूहिक पुस्तक विमोचन कार्यक्रम हुँदै आएका छन् । गत वर्ष बर्दियाको बह्रैया तालमा आयोजित कार्यक्रममा डेढ दर्जन साहित्यिक किताब विमोचन गरिएको थियो । चालू वर्ष रुपन्देहीमा हुने सम्मेलनमा पनि करीब २ दर्जन किताब विमोचनको तयारी भइरहेको समेत अध्यक्ष सर्वहारीको भनाई छ ।

संघले आफ्नो साहित्यिक गतिविधि नेपालमा मात्रै सीमित नराखी भारतमा पनि विस्तार गर्ने रणनीति लिएको छ । भारतका थारु साहित्यकारलाई संगठित गरी त्यहाँका थारु भाषा, साहित्य र संस्कृतिको दस्तावेजीकरण गर्ने योजना अध्यक्ष सर्वहारीले सुनाए ।

मंसिर २९, २०७५ मा प्रकाशित

लखन चाैधरी

लखन चौधरी लोकान्तरका लागि प्रदेश नम्बर ७ का प्रतिनिधि हुन् । 

लेखकबाट थप...

प्रतिक्रिया दिनुहोस