काठमाडौं– लामो समयदेखि काँग्रेसभित्र देखिएको पदाधिकारीको संख्यासम्बन्धी विवाद टुंगिएको छ । 

काँग्रेस शीर्ष तहमा मंगलबार दिनभर भएको छलफलबाट प्रवक्तासहित ९ पदाधिकारी बनाउने सहमति भएको हो । 

सहमतिअनुसार  उपसभापति, महामन्त्री र सहमहामन्त्री २–२ जना हुनेछन् । ती सबै निर्वाचित हुने व्यवस्था गर्ने सहमति भएको छ । यस्तै कोषाध्यक्ष र प्रवक्ता भने मनोनित गरिनेछ । 

काँग्रेस नेता गुरुराज घिमिरेले ९ जना पदाधिकारी राख्न नेताहरुबीच सहमति भएको र तीमध्ये कोषाध्यक्ष र प्रवक्तामात्रै मनोनित गरिने व्यवस्था गर्न लागिएको जानकारी दिए । 

शीर्ष तहमा सहमति भएसँगै विधान मस्यौदा महासमिति बैठकमा पेश गर्ने बाटो खुलेको छ । आजको महासमिति बैठकमा विधानको माग गर्दै नेतृत्व र केही प्रतिनिधिबीच भनाभनको अवस्था समेत सिर्जना भएको थियो ।

विधानलाई केन्द्रीय समितिले अनुमोदन गरेपछि महासमिति बैठकमा छलफलका लागि लगिनेछ ।