काठमाडौं – परराष्ट्रमन्त्री प्रदीप ज्ञवाली र अमेरिकी विदेश मन्त्री माइक पम्पेओबीच भेटवार्ता भएको छ । भेटवार्ता मंगलवार वाशिङ्टनमा भएको हो ।

नेपाल र अमेरिकाबीच परराष्ट्रमन्त्री स्तरमा भेटवार्ता भएको १७ वर्षपछि यो पहिलो पटक हो । भेटपछि परराष्ट्र मन्त्री ज्ञवालीले एकदमै महत्त्वपूर्ण र सौहार्दपूर्ण कुराकानी भएको प्रतिक्रिया दिएका छन् ।

'अमेरिका र नेपालबीचको सम्बन्धलाई साझा अठोटका साथ अझ फराकिलो बनाउँदै लगेर पारस्परिक हितमा काम गर्न साझा प्रतिबद्धता जनाएका छौं,' मन्त्री ज्ञवालीले भनेका छन् ।

ज्ञवालीले नेपाल सरकारले ‘सुखी नेपाली, समृद्ध नेपाल’ नारालाई व्यापार, लगानी र सहायताको मार्फतबाट अगाडि बढाउन खाजेको र त्यसमा अमेरिका सकारात्मक रहेको जानकारी दिए ।

मन्त्री ज्ञवालीले अमेरिकी सरकारका उच्च अधिकारीसँगको छलफलमा नेपालले तीनै तहको निर्वाचन सम्पन्न गरेर स्थिर सरकारको जग बसाल्न सफल भएको जानकारी गराएका थिए ।

भेटवार्तापछि ट्वीट गर्दै अमेरिकी विदेश मन्त्रालयले भनेको छ- खुला, स्वतन्त्र र समृद्ध हिन्द-प्रशान्त क्षेत्रमा नेपालको केन्द्रीय भूमिकाका बारेमा दुई नेताबीच कुराकानी भएको छ ।'