काठमाडौं – अफ्रिकन मूलकी १२ वर्षीय अमेरिकन बालिका खेरिस रोजर्स एक कम्पनीको सीइओ बनेकी छिन् ।

अमेरिकाको लास एन्जलसमा आफैले खोलेको ‘फ्लेक्सिन इन माइ कम्प्लेक्सन’ नामको डिजाइनिङ कम्पनीको सीइओ बनेकी रोजर्सले अहिलेसम्म २ लाख डलरभन्दा बढी कमाइसकेकी छिन् ।

उनले कम्पनी २०१७ अप्रिलबाट शुरू गरेकी थिइन् । रोजर्स भन्छिन्, ‘फ्लेक्सिन इन माई कम्प्लेक्सन’को शुरूवात त्यतिबेला भयो, जतिबेला उनकी दिदीले १० वर्षकी रोजर्सको एउटा फोटो ट्वीटरमा पोस्ट गरिन्, जसको ह्यास ट्याग थियो, ‘फ्लेक्सिन इन हर कम्प्लेक्सन ।’ त्यतिबेला त्यो फोटो ट्वीटरमा भाइरल बनेको थियो । 

रोजर्सको कम्पनीले टिसर्ट छापेर बेच्ने काम गर्छ । उनका टिसर्टहरूमा ‘आफ्नो छालाको रंगलाई लिएर चिन्तित नहुनुस्, जिन्दगी खुलेर बिताउनुहोस्’ भन्ने खालका सन्देशहरू लेखिएका हुन्छन् । 

अमेरिकामा रहेका अश्वेत जातिलाई रोजर्सका टिसर्टमा लेखिने सन्देशहरूले प्रेरणा दिइरहेका छन् । यही प्रेरणाको बलमा रोजर्सको कम्पनीले पैसा कमाइरहेको छ । 

रोजर्सले आफ्नो यो व्यवसाय जम्मा १५० डलरबाट शुरुवात गरेकी थिइन् । उनी भन्छिन्, ‘आमाले मलाई बिजनेश शुरू गर्नको लागि जम्मा १५० डलर दिनुभएको थियो, तर गत डेढ वर्षमा मैले २ लाख डलरभन्दा बढी कमाएकी छु ।’ (अन्तर्राष्ट्रिय सञ्चारमाध्यमको सहयोगमा)