काठमाडौं — अस्ट्रेलियाको सिड्नीमा सोमवार पानी परिरहेर अन्तिम दिनको खेल सम्भव नभएपछि शृंखलाको चौथो तथा अन्तिम खेल बराबरीमा टुंगिएको छ । 

खेल बराबरीमा टुंगिएपनि भारतले शृंखला जितेर इतिहास रचेको छ । अस्ट्रेलिया भ्रमण गरेको ७१ वर्षपछि भारतले बल्ल शृंखला जित्न सकेको हो । 

टस जितेर पहिले ब्याटिङ गरेको भारतले ६२२ रनको विशाल स्कोर बनाएर पारी घोषित गरिदियो । चेतेश्वर पुजाराले शानदार १९३ रन बनाए । कुल ३७३ बलको सामना गरेका पुजाराले २२ चौका प्रहार गरे । दोहोरो शतक बनाउनबाट
उनी सात रनले चुके । उनलाई नाथन लियोनले कट एन्ड बोल्ड गरे ।

अनि विकेटकीपर ऋषभ पन्तले १८९ बलमा तीव्र १५९ रन बनाए । उनले १५ चौका र एक छक्का प्रहार गरे ।

पुजारा र पन्तबीच छैठौं विकेटका लागि १८९ को विशाल साझेदारी बन्यो । त्यसपछि सातौं विकेटका लागि पन्त र रवीन्द्र जडेजाका बीच २०४ रनको साझेदारी बन्यो । जडेजाले ८१ रन बनाए । 

अन्य ब्याट्स्म्यानमा मयंक अग्रवालको ७७ रन उल्लेखनीय रह्यो ।

अस्ट्रेलियाका बलरहरूलाई भारतीय ब्याट्स्म्यान निकै भारी ठहरिए । नाथन लियोनले चार विकेट त लिए तर त्यसका लागि १७८ रन खर्चिए । प्रमुख चार बलर सबैले सयभन्दा बढी रन दिए ।

जवाफमा ब्याटिङ गरेको अस्ट्रेलियाले राम्रो प्रदर्शन गर्न सकेन र जम्मा ३०० रनमा अलआउट भयो । ओपनर मार्कस ह्यारिसले सर्वाधिक ७९ रन बनाए ।

भारतका लागि कुलदीप यादवले पाँच विकेट हात पारे । मोहम्मद शामी र रवीन्द्र जडेजाले दुई दुई विकेट लिए । 

पहिलो पारीमा ३२२ रनले पछि परेको अस्ट्रेलियालाई भारतले फलोअन गरायो । अस्ट्रेलियाले चार ओभर खेलेर ६ रन बनाउँदा पानी पर्न थाल्यो । त्यसपछि लगातार पानीले खेलमा बाधा तेर्स्याएपछि खेल बराबरीमा टुंगियो ।

भारतका ब्याट्स्म्यान चेतेश्वर पुजारा म्यान अफ द म्याच र म्यान अफ द सिरिज घोषित भए ।